Мо дене 2015 ий шарнымашеш кодеш?

Идалык мучашкат лишемеш. «Кидшер» интернет-журналын лудшыжо-влак кузе эртыше ийым ужатат? Могай иктешлымашым ыштат? Толшаш идалык деч мом вучат? Айста, икмынярже дене, палыме лийына.
Татьяна Пчёлкина, «Кугарня» газетын корреспондентше: Идалык тӱҥалтыште 45 ийым темыме лӱмеш да усталык аланыште 30 ий лӱмеш пӧлеклалтше «Муралтынем эн ныжыл мурым» усталык касым эртаренам. «Шийгорно» проект дене Пошкырт, Татарстан да Урал кундемлаш мийен-коштмына шарнымашеш кодеш. Мария ӱдырем Москосо Щепкин лӱмеш кӱшыл театр училищым тунем толын. Шкетан лӱмеш театрын артисткыже лийын. Тиде ава семын мылам кӱкшыт.
У муро-влак шочыныт. У ийыште у книга-влакым лукташ шонем, тудо ямде.
«Кидшер» интернет-журналлан тау, илыш дене тӧр ошкылеш, шуко увер дене палдара. Тек лудшыжо шуко лиеш.

Надежда Ильина, студент: Эртыше 2015 ий мыланем шуко весела да шарнымашеш кодшо кече-влакым пӧлеклен.
Тений школым тунем лектынам да, Ижевск олаш йоча эмлызылан тунемаш пуренам. Чыным ойлаш гын, мылам тиде пиал. Кунам йочам куандарет, тудын шыргыжалмыже илышым волгалтара.
Кеҥежат мондалтдыме шарнымашым коден. Марий самырык тукымын VII слётышкыжо, «Кравец» форумыш миен-толынам. Тушто шерге деч шерге поро деч поро йолташ-влакым муынам. Иктешлен каласаш гын, 2015 ий моткоч пайдалын эртен. Эртыше ий мыйын шонымашем илыш нерген пӱтынь вашталтен. Шушаш идалык эшеат веселан да пайдалын эрта манын шонем.
Лудшо-влаклан, эн тӱҥжым- тазалыкым тыланем. Икте-весым пагален илыза, йӧратыме да йӧратыше лийза. Тек 2016 ий эн кугу пиалым тыланда конда.

Алеся Владимирова, «Марий Эл» ГТРК-н пашаеҥже:
Идалык пеш сай да лектышан лийын. Шуко у еҥ дене, нунын пашашт дене палыме лийынам. Ик ганат лийдыме олалаште лийынам — тиде кугу куаным конден! Тыгак тӱрлӧ фестиваль, конкурсла сай да поро шарнымашым веле коденыт. Пашаштемат шинчымашым погаш Моско олаш миен толынам, квалификацием нӧлтенам.
Идалык деч чыла сайым вел вучен кодам. Моло-влакынат чыла сай лийже. Кӱлдымыжӧ,  осалже чыла шеҥгелан кодшо. У шонымаш да сеҥымаш веле ончылно вучыжо!

Надежда Васильева, поэтессе:
Эртыше идалык илышышкем шуко сай вашталтышым пуртен. Усталык илышым ончалаш гын, Эстонийыште ныл йылме дене книгам лектын. Шукерте огыл Йошкар-Олаште сылнымут идалыкым иктешлыме усталык кас эртыш. Куд автор коклаште лияш мыламат пиал шыргыжале. Тидыжат могай-гынат кӱкшыт, шонем. Ешыштемат вашталтыш уло — кокымшо гана ава лийым. Пашаштемат у кӱкшытыш шуынам. Чыла тидыже, мутат уке, моткоч куандара.
Шушаш идалыклан ятыр сомылым шонен ямдыленам, вий ден чытыш гына ситышт. Изинек мый ик девиз дене илем: Нигунам ит ойло: «Нигунам». Сандене «Кидшер» интернет-журналын лудшыжо-влаклан мый тыге каласынем: ида лӱд ум тӱҥалаш, ида лӱд у корныш шогалаш. Ала те шке мастарлыкдам эше огыдат пале — кычалза, тӧчыза, ӱшаныза шке вийлан да нигунам ида ман: «Нигунам».

Михаил Александров, М.Шкетан лÿмеш Марий кугыжаныш драме театр марий театрын артистше:
Кече почеш кече, тылзе почеш тылзе. Идалык почеш идалык эрта, но эртыше идалык кажныжын илышыштыже шуко шуко оҥайым кода. Мыйымат эртыше идалык ӧрдыжыш шӱкалын коден огыл. Авамлан, изам-влаклан да шӱжаремлан — шешкым, мыланем пелашым пӧлеклен. Мутат уке тиде пеш кугу пӧлек.
Ӱшанен кодам, шушаш маймыл ий пӧлек деч посна ок кодо. Вет кушто кокыт- тушто кумыт. Чылаштлан еш пиалым да у шӱлышан йӧратымашым тыланем, вет у идалыкше але тӱҥалеш веле.

Вера Гордеева, поэтессе:
2015 ий – шкешотан идалык. Куштылго манын ом керт, кажне эртыше ий шке семынже неле. Шуко паша ышталтын, эше шуко у шонымаш вуйышто пӧрдеш — ончыкылык ийлаште илышыш шыҥдарыман. Профессионально кушкаш, усталык корным вияҥдаш, шӱм-чон ласкалыкым «стабильность» манме состоянийыш шукташ – тиде тӱҥ сомыл. Идалыкым иктешлыме семын иктым ойлен кертам – почеламут сборникым лукташ ямдылалтына. Шушаш ийыште лекшаш. Тиде мыланем, самырык возкалышылан, кугу куан.
Мом шонен пыштенам – 2015 ийыште чыла ыштенам. Сандене, тиде мыланем шкешотан кӱкшыт.
Шушаш идалык деч мый чон лыпландарымашым да тыныс илышым вучем. Утым ом йод, мо улым арален мошташ кӱлеш. Да тек йырем улшо ӱшанле еҥ-влак пиалан да таза лийыт. У ий дене, йолташ-влак!
«Кидшерын» йолташыже-шамычлан тыланем кажне пашаште почылтшо омсам, жапыште кӱлеш верыште лийын мошташ да куштылгын шке шонымашыш шуаш.

Василий Петров, мер пашаеҥ:
Ик айдемат моктанаш огеш тӱҥал дыр, мый тидым але тудым ыштенам манын, но йодыш чын. Кажне марийлан тыгай йодышым пуыман. Иктым каласен кертам, кугу пашаш ушненам. Моткоч ӱшанем, тиде паша марий калыкланат пайдам конда. Тендан журналлан, мутат уке, шуко лудшым тыланем, эре куан дене илыза, кажне марий пӧртыш тӱкалтен пурыза да куандарен кодыза. Марий-влак пошкудо-влак дене ваш-ваш келшен илышаш улыт. Келшен илен моштымаш — кугу искусство. Но тиде сомылым шукташ пеш мудреч лийман, келшен илен моштымаш. Шушаш ийыште кугу сеҥымашым вучем — порылык осалым сеҥышаш. Калыкын ушыжо яндарештшаш!

Кидшер
Шонымашым ешараш