Республикысе йочасадыш коштшо икшыве-влак «Пеледше тукым» йоча усталык конкурсыш чумыргат.
Конкурс 28 мартыште Калыкле президент школ-интернатыште эрта. Тышке районлаште сеҥышыш лекше йоча-влак республикысе таҥасымашыш ушнат.
Ушештарем, республикысе «Пеледше тукым» йоча усталык конкурс кодшо курымын 90-ше ийлаштыже шочын. Тудым ондак Йошкар-Ола кӱкшытыштӧ эртареныт гын, тачысе кечылан, республикысе кӱкшытыштӧ эртарат. «Пеледше тукым» конкурс кок ийлан ик гана эрта да школлаште тунемше-влакын «Самырык тукым» усталык конкурсышт дене икте-весыштым алмаштат: ик ийын – ик таҥасымаш, вес ийын – весыже.
Йошкар-Ола да республикысе 12 район гыч 110 йоча 73 кугыеҥын полшымышт дене йомак-влакым модын ончыктат. «Калык вургеман курчак» ончерыште 162 курчак лиеш. Курчак-влакым кугыеҥ-шамычын полшымышт дене 157 йоча ямдыленыт. «Йомак-2016» конкурсыш 34 автор деч 38 паша пурен.  Палдарат организатор-влак.
Конкурсым Республикысе марий тӱвыра рӱдер, Марий Элысе тӱвыра, печать да калык-влакын пашашт шотышто министерстве, Марий Элысе туныктымаш да шанче министерстве эртарат.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.