Самырык автор-влаклан полшымо шонымаш дене…

Сылнымут корным ойырен налше самырык автор-влаклан ӱшанлын йол ӱмак шогалаш полшаш манын, В. Абукаев-Эмгак лӱмеш «Ший памаш» сылнымут фонд конкурсым увертарен.
Конкурс В.Абукаев-Эмгакын тыгай ÿжмутшо дене эрта: «Таче возымет теҥгечысе деч сайрак лийшаш!». 
Конкурсын тÿҥ шонымашыже:
— шочмо йылме, сылнымут полшымо дене самырык авторын (кыдалаш да кӱшыл школышто тунемшын, тыгак кумда илыш корныш икымше ошкылым ыштышын) чон арулыкшым аралаш;
— кöргö чон куатшым пеҥгыдемдаш;
— шинчымашыжым кумдаҥдаш;
— йылме усталыкшым вияҥдаш.
Конкурсын ыштышаш пашаже:
— серыме пашалан кумылан ÿдыр-рвезе-влакым чумыраш;
— сылнымут полшымо дене рвезе еҥлан шочмо калыкнан историйжым, йылмыжым, тÿвыражым, философийжым аклаш йöным ышташ;
— сылнымут гоч рвезе еҥын тÿняумылымашыжым кумдаҥдаш;
— сылнымут дене шÿлышö пиалан айдемым кушташ;
— самырык еҥлан усталыкшым вияҥдаш йöным ышташ;
— ончыкылык сылнымутчо, журналист-влакым кушташ.
Конкурсым эртарыше-влак:
— «Ончыко» сылнымут да мер-политик журнал: 424006, Йошкар-Ола, Панфилов урем, 39. Тел.: 45-34-64;
— «Марий Эл» газет: 424006, Йошкар-Ола, СССР Вооружённый Вийын 70-ше идалыкше урем, 20. Тел.: 41-23-71;
— «Кугарня» самырык-влаклан газет: 424006, Йошкар-Ола, СССР Вооружённый Вийын 70-ше идалыкше урем, 20. Тел.: 45-43-72;
— «Кече-Солнышко» йоча журнал: 424004, Йошкар-Ола, Амстердам пл., 2. Тел.: 64-19-33.
Серымылан акым редколлегий пуа:
1. В.В.Краснов, поро кумылым ончыктышо «Ший памаш» фондым вуйлатыше.
2. Л.А.Абукаева, филологий шанче доктор, Марий кугыжаныш университетын профессоржо.
3. А.С.Абдулов, «Марий Эл» газет» ООО-н директор-тÿҥ редакторжо, историй шанче кандидат.
4. С.Д.Архипова, «Кече» журналын тÿҥ редакторжо, Россий писатель ушемын Марий Элысе пӧлкажым вуйлатыше, поэт.
5. В.А.Кольцов, ВГТРК-н «Марий Эл» КТРК филиалжын радиовещаний службыжын начальникше.
6. М.И.Матвеев, М.Шкетан лӱмеш Марий кугыжаныш драме театрын директоржо;
7. Э.А.Иманаев, «Кугарня» газет» ГУКП-ын директор-тÿҥ редакторжо.
8. Ю.И.Соловьёв, «Марий журнал» ГУКП-ын директоржо, прозаик.
9. Г.Л.Сабанцев, поэт.
11. А.Т.Тимиркаев, «Ончыко» журналын тÿҥ редакторжо, поэт.
Автор-влакын серымышт тыгай йыжыҥ дене аклалтеш:
— эн сай поэзий — «Кинде-шинчал» премий;
— эн сай прозо — «Ошкеча» премий;
— эн сай драматургий — «Кайыккомбо кашта» премий;
— эн сай журналист паша — «Почылтшо чон» премий;
— эн сай теле-радиожурналист паша, блогер — «Канде толкын» премий.
Конкурсын эртыме радамже:
— конкурсыш Россий Федерацийыште илыше, марла серыше 35 ий марте ийготан кажне самырык еҥ ушнен кертеш. Нуно, жанрым шотыш налын, пашам ыштышаш улыт;
— автор шке возымыжым (компьютереш поген печатлымым; 1 экз.) «Ончыко» журнал але «Марий Эл» да «Кугарня» газет редакцийлашке «В.Абукаев-Эмгак лÿмеш конкурсыш» палемдымаш дене колта;
— редколлегий (прозо — А.Т.Тимиркаев, поэзий — Г.Л.Сабанцев, драматургий — Ю.И.Соловьёв, М.И.Матвеев, журналистике — В.А.Кольцов, Э.А.Иманаев) автор дене пашам ышта. Тыгодым кугу тÿткышым авторын мутвундо поянлыкшылан, марла ойым, сылнымут произведенийын кышкаржым чын чоҥен моштымылан ойырат;
— 1 ноябрь гыч 1 декабрь марте автор Фондын вуйлатышыж лÿмеш йодмашым сера. Газет ден журналлаште савыкталтше сылнымутшым але книгажым редколлегийлан аклаш темла. Документым «Ончыко» журнал редакцийыш кондыман;
— конкурс Йошкар-Олаште Марий Элын Калык Серызыже Вячеслав Абукаев-Эмгакын шочмо кечыжым палемдыме годым (декабрь мучаш) иктешлалтеш;
— конкурслык роскотым Фондын вуйлатышыже В.Краснов палемден. 2016 ийысе фонд — 100 000 теҥге;
— сеҥыше-влаклан диплом ден окса премий (20 000 теҥге) кучыкталтеш.

УВЕРТАРЫМАШ
Поро кумылым ончыктышо «Ший памаш» фонд самырык автор-влаклан полшаш шонышо бизнес пашаеҥ, озанлык да предприятий вуйлатыше, амалкалче-влакым пырля ушнаш ӱжеш.
Шке надырым пышташ кумылан-влаклан реквизитышытым увертара:

«Банк получателя» Отделение №8627 Сбербанка России г. Мурманск
«БИК» Банка получателя 044705615
«Сч. №» Банка получателя 30101810300000000615
«Сч. №» получателя 40703810241000018148
«Получатель» БФ «Ший памаш» (Серебряный родник)
«ИНН получателя» 5110102766

Кидшер
Шонымашым ешараш