Таче Йошкар-Олаште марий калыкнан Х погынжо почылтын. Погынышто 299 делегат, 60 эскерыше, 30 журналист пашам ыштат, 175 еҥ уна семын ӱжмӧ.
Погыным Оньыжа Анатолий Иванов почын. Пашам эртарен колташ манын, мандатный, ревизионный, шотлышо комиссий-влакым, секретариатым сайленыт. Калыкым ты кугу пайрем дене саламлаш Россий Федераций Кугыжаныш Думын депутатше Лариса Яковлева, Марий Эл Кугыжаныш Погынын председательже Юрий Минаков, республикыште тӱҥ федеральный инспектор Павел Логинов толыныт. Варажым тӱрлӧ вер гыч толшо погынлан пӧлеклалтше телеграмме-влакым йоҥгалтарышт.  Анатолий Иванов эртыме ныл ийыште Мер Каҥашын тыршымыж дене могай паша шукталтмым шке докладыштыже радамлен, марий калыкым умбакыжат пырля тыршен, келшен илаш йодын.
Погыныш Марий Элым вуйлатыше Леонид Маркеловат толын. Тудо регионышто тӱрлӧ отрасльыште могай паша шукталтмым палемден коден. Саламмут деч вара Леонид Маркелов Марий Элысе йоча да самырык-влаклан театр-рӱдерын директоржо, Марий калык конгрессын вуйлатышыже Эдуард Александровлан да Татарстан Республикысе Марий национально-культурный автономийым вуйлатыше Олег Третьяковлан Марий Эл республикын сулло пашаеҥже лӱмым пуэн.
Тылеч вара ревизионный комиссийын отчётшо йоҥгалтын. Участник-влак икмыняр докладым колыштыч, но жап ситыдымылан кӧра икмыняр еҥын докладыштым эрла  гына колына. Кечывал деч вара Марий Элысе Мер-политике рӱдерыште «Самырык тукым да тачысе саман», «Шочмо йылме да еш», «Марий йӱла» секцийлаште паша эртен. Умбакыже «Россий кугыжанышыште марий калыкын верже да марий калык толкынын ончыкылык вияҥме корныжо» йыргешке ӱстел эртен.
Делегат, эскерыше да уна-влаклан каналташлан «Акпатыр» опере да «Марий кас» темлалтыныт.



Евгений Никифоров, Николай Любимов

ВАШМУТЫМ КОДАШ

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.