Марий калыкын Х погынжо эртен

Теҥгече шочмо калыкнан Х погынжо пашажым мучашлыш.
Марий Элысе тӱвыра, печать да калык-влакын пашашт шотышто министр Михаил Васютин  эн ондак мутым «Марий Эл Радион» тӱҥ редакторжо Владимир Матвеевлан пуэн. Тидыже толшо делегат, эскерыше да уна-влакын йодмашышт дене кылдалтын. «Моло кундемлаште «Марий Эл Радиом»  кузе колышташ?» ятыр йодыш пурен. «Радиом таче кеч-могай йӧн дене, кеч могай лукышто колышташ лиеш. Тидлан радион сайтышкыже пураш але «ТВ и радио на Патриаршей» приложенийым гына телефонышко вераҥдаш кӱлеш», — палемдыш Владимир Матвеев.
Варажым Татарстан кундемысе Марий национально-культурный автономийым вуйлатыше Олег Третьяков шке кундемыштыже эртарыме паша нерген палдарен.
Умбакыже блоггер Эльвира Куклина марий йылмым интернетыште да компьютер технологийыште шыҥдарыме нерген ойлен. Трибун ончылно ончычсо Оньыжа Василий Пектеев марий калыкын неле могыржым почын пуаш тыршен.
Варажым секций-влакын пашаштым иктешленыт. «Самырык тукым да тачысе саман» секцийлан вуйын шогышо Алёна Иванова самырык ӱдыр-рвезе-влакын ыштыме пашаже, тачысе кечылан проблемыже-влак нерген палдарыш. Зал Алёнам ик шӱлыш дене колышто, мучашлан совым шокшын перышт.  «Марий йӱла» секций гыч Эрик Юзыкайн лекте. Секцийыште мутланыме ятыр темым нӧлтале. «Марий калыкын шке лӱмжӧ уло. Марий айдеме «Я мариец» але «Я мари» огыл,  а «Мый марий улам» манеш гын, путырак сай лиеш», — кошартыш шке мутшым Эрик Алексеевич. «Шочмо йылме да еш» секцийын вӱдышыжӧ Лидия Иксанова докладчик-влакын темыштым, марий йылмым туныктымаште ятыр пашам ышташ кӱлмӧ нерген палемден кодыш.
Лариса Яковлева мутым нале. Тудо кажне Оньыжан могай ойгыжо, паша лектышыже улмо нерген ойлыш. «Эртаралтыт пайрем-влак, Йыван Кырлалан бюстым шогалтыме, Российысе марий самырык тукымын слётшо, выездной заседаний-влак эртат. Кунам ме пырля лийына, тунам веле лектыш лиеш», — мучашлыш шке ойжым Лариса Николаевна.
Умбакыже у Оньыжам сайлыме процедуро тӱҥалын. Оньыжалан кум кандидат лийын: Эдуард Александров, Анатолий Радыгин, Василий Пектеев. Анатолий Радыгин кандидатурыжым кораҥдаш йодын. Тыге кок кандидат гына кодын. Виш (открытый) йӱклымашым эртарыме нерген кутырен келшымек, йӱклымаш эртен. Эдуард Александровлан — 207 йӱк, Василий Пектевлан — 38 еҥ, 14 делегат йӱклен огыл. У Оньыжа калык ончылно  товатлыме мутым каласен.
Умбакыже у Мер каҥашым пеҥгыдемденыт. Мучашлан фотовойзалтмаш лийын.
Лишыл жапыште резолюций, доклад-влакым савыктена. Сайтнам эскерен шогыза.








Кидшер
Шонымашым ешараш