Тунам илышыже весе лийын…

0
58
гана онченыт

Йӧратыме ковам - Ларионова Мария Алексеевна. Кызыт тудлан - 85 ий. Тиде шуко але шагал? Шке шоналтыза. Тиде жапыште йӱштыжат, шокшыжат, сайжат-осалжат ужаш да чыташ пернен.
Изиж годым тыгаяк йоча лийын: модын, воштылын, юарлен. А весела пагытше гын ковамын шагал лийын. Смола заводышто пашам ыштен. А паша тушто могай, ме Сергей Чавайнын серымыж гыч палена. Йӧсыжо, нелыже ковамланат чыташыже пернен. Мый южгунамже ӧрам: кузе самырык ӱдыр чыла тидым чытен лектын. Кушеч вийже тунам лектын? Молан айдеме тынар нелым чыта? 
Кугу сар годымат ковам пашам ыштен. Шылаш, утлаш йӧным кычалын огыл. Тыгай шонымашыже вуйышкыжо пуренат огыл.
«Эх, уныкам, тунам вет илышыже весе лийын. Тушманым сеҥаш полшаш кӱлын. Сеҥымашлан ӱшанымаш - мыланем веле огыл, моло-влакланат вийым пуэн. Сеҥымаш толмеке, куанже мыняре ыле. А мыняр шортмыжо», - ойла ковам.
Кызыт мемнан дене пырля ила. Ме чыланат тудым йӧратена, пагалена. Мыйымат ик йодыш тургыжландара: мыят ковам семын чыла нелым чытен, сеҥен кертам ыле мо? Вашештем: «Кертам». Вет тукым кыл уло. Тиде кыл моткоч пеҥгыде. Тудым ковам мыланем пуэн.

Васильева Ангелина, Морко район, Коркатово лицей, 10-шо класс

Текстыште йоҥылышым муында гын, пожалуйста, йоҥылышым палемден Ctrl+Enter темдалза.

ВАШМУТЫМ КОДЫЗА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.