Марий калыкын Х погынжын резолюцийже

0
51
гана онченыт

Марий мер толкын Россий Федерацийын гражданже-влакын поро кумылышт почеш ышталтше, шуко еҥым ушен шогышо мер организаций улмыжым 2012-2016 ийласе пашаж дене пеҥгыдемден ончыктен.
Мер толкын шке пашажым марий йылмым, тӱвырам, кугезе йӱлам да шкешамжым (самосознанийжым) арален кодаш да вияҥдаш, гражданский обществым ышташ, Россий Федерацийыште социально-экономический вашталтышым ышташ полшаш да пӱтынь марий калыкым Россий кугыжанышын тӱвыра-политик илышышкыже кумдан ушаш шонымаш дене виктарен шоген. 
Мер толкын Марий Эл Республикыште да Россий Федерацийыште марий-влакын тӱшкан илыме кундемлаштышт кугыжаныш кучемын законодательный ден исполнительный органже, тыгак верысе самоуправлений орган-влак дене пеҥгыде кылым кучен пашам ышта. Тидыже пӱтынь марий тӱням кугу да пеҥгыде вий семын иктыш чумыраш йӧным ышта

1. Марий Мер Каҥашын 2012-2016 ийлаште шуктымо ныл ияш пашажым сайлан шотлаш.
2. Темлымаш-влакым шотыш налын, Марий калыкын Х погынжын резолюцийжым пеҥгыдемдаш.
3. Икымше марий калык погынлан 100 ий теммым шотыш налын, тиде юбилейлан пӧлеклалтше мероприятий программым ышташ Марий Мер Каҥашлан, марий ушем-влаклан темлаш.
4. 2020 ийыште Марий автономный областьым ыштымылан 100 ий темеш. Марий Мер Каҥашлан тиде кугу юбилейым сайын эртарыме шотышто тӱрлӧ корно дене пашам шуктымо программым ямдылаш кӱшташ.
Йошкар-Ола, 2016 ий 16 апрель.
Пытартыш ийлаште марий тӱня утларак пеҥгыде, чолгарак да усталык шӱлышан, вияҥмаште у корным кычалше кумылан лийын.
Марий калыкын Х погынжо марий сылнымутлан негызым пыштыше поэтын шочмыжлан 125 ий темме кече вашеш «С.Г.Чавайнын сылнымут да тӱвыра поянлыкше» тӱнямбал кӱкшытан научно-практический конференцийым Марий Эл Республикын Культур, печать да национальность паша шотышто министерствыж дене пырля эртарымым, тыгак кугыжаныш деятель, Марий облисполкомын икымше председательже Иван Петрович Петровлан Морко районысо Шеҥше селаште бюджет окса кӱшеш бюстым почмым, Морко районысо Пумыр ялыште чапланыше поэт Валентин Колумблан шочмыжлан 80 ий темме лӱмеш верысе калыкын темлымыж почеш бронзо бюстым почмым, 2012-2016 ийлаште лӱмлӧ марий мер ден культур пашаеҥ-влаклан мемориальный оҥам почмым, йоча-влаклан «Изи мӧр пеледыш» тӱвыра пайремым, Марий самырык тукым слётым эртарен шогымым Марий Мер Каҥашын ик эн кӱлешан пашаж семын акла.
Пытартыш жапыште школлаште марий йылмым тунемме паша начаремын, тиде предметым тунемаш ойырымо шагат шагалемеш. Чыла тидым шотыш налын, Марий Мер Каҥаш, «Марий национальный конгресс» Марий Эл Республикын Образований да науко министерствыже дене пырля улшо экшыкым кораҥдышашлан икмыняр пашам шуктеныт. Мутлан, Йошкар-Олаште да Шернурышто школлаште марий йылмым туныктымым арален кодымо шумлык общественный колыштмашым эртареныт. Но эше ятыр йодыш кодын. Сандене Марий калыкын Х погынжо школлаште шочмо марий йылмым туныктымо йодышлан эреак тӱткышым ойырен шогаш кӱлмым палемда. Тидлан кугу опытан да сай квалификациян туныктышо-влак кӱлыт, марий йылме дене учебник ден учебно-методический пособий-влакым ситышын савыктен лукман. Тыгак библиотекылашке марий сылнымутан литературым шукырак колтен шогаш кӱлеш.
2015 ийыште Марий калыкын федеральный национально-культурный автономийжым регистрироватлымым кугу сеҥымаш семын аклыман. Тидыже регионлаште шуктен толмо мер пашам вияҥден колташ вий-куатым ешара, тиде пашаш у шӱлышым пурта.
Глобализаций курым мемнан ончылно у деч у задачым шында. Нунын коклаште ме, марий мер толкынын еҥже-влак, обществым гражданский сӧрасымаш негызеш пеҥгыдемден толмым, шке калыкым арален кодымым, моло финн-угор калык-влак дене чак кылым кучымым ик эн тӱҥ задачылан шотлена.
Марий калыкын чотшын иземмыжым, республикын политический структурыштыжо тӱп калык гыч улшо еҥ-влакын шагалеммыштым, марий йылмым туныктымаште улшо нелылыкым, элын экономикыштыже кризис палдырнымым, марий ял-влакын шолдырген толмыштым шотыш налын, Марий калыкын Х погынжо шочмо йылмым, культурым, кугезе йӱла ден трпадицийым, калыкын шамжым арален кодаш кӱлмым, тыгак ял калыкын илышыжым саемдаш, ялысе социальный инфраструктурым вияҥдаш, шочмо мландым тӱзаташ кӱлмым палемда.
Марий калыкым арален кодышашлан да ешарен толшашлан йочасадлаште марий группо-влакым почаш, школлаште марий йылмым туныктымо пашам кӱлеш кӱкшытыш нєлталаш, Россий Федерацийын регионлаштыже кугу тӱшка дене илыше марий-влак дене пырля пашам ыштыме кылым пеҥгыдемдаш, калык да конфессий-влак коклаште келшымашым пеҥгыдемдаш, национальный сӧрасымашке шуаш кӱлеш. Марий калыкын Х погынжо чыла нине йодышым марий мер толкынын пашаштыже ик эн кӱлешанлан шотла. Погын Марий Эл Республикысе да пӱтынь Российысе моло калык-влак дене келшен да сӧрасен илаш, пырля пашам ыштыме кылым пеҥгыдемдаш, лекше нелылыкым тӱшка вий дене тӧрлаш марий калыкым ӱжеш.
Марий калыкын Х погынжо марий калыкын шамжым, тӱняумылымашыжым вияҥдымаште, шӱм-чон поянлыкым ешарен толмаште, марий калыкым наций семын арален кодымаште, этносым вияҥдыме пеш кӱлешан задаче-влакым тӧрлымаште калыкын чыла ужашыжым чак чумырен шогымаште да икояным ыштымаште массовый информацийын печатный ден электронный средствыже-влакын шуктен шогымо рольыштын кугеммыжым палемда. Кызыт Россий Федерацийыште 18 газет ден журнал марий йылме дене лектыт, кок телестудий да кок радиостанций марий йылме дене пашам ыштат, Интернетын марий сегментше вияҥеш. Чыла тидыже калыкын духовный культурыжым пойдараш, шочмо йылмым вияҥдаш йӧным ышта, юнкор-влакым кушташ да туныкташ келшыше негызым ямдыла.
Ситыдымаш-влакат улыт. Нунын коклаште профессиональный уста ждурналист-влакын шагал улмыштым, периодический изданий-влаклан возалтме ак шергешт толмылан кєра подписчик-влакын шагалеммыштым палемдаш кӱлеш, марий СМИ-влакын материально-технический негызыштым пеҥгыдемдыман.
Марий калыкын Х погынжо марий юмыйӱлам марий культурын ик эн кӱлешан ужашыжлан шотла. Марий йӱлам ятыр жап шыгыремдылме, сандене марий юмыйӱла мондалташ тӱҥалын. Отыш лектын кумалтышым уэш эртараш тӱҥалмылан кӧра тошто марий йӱла у шӱлышым налын, пӱтынь марий традиционный культур дек интерес кугемеш.
Марий калыкын Х погынжо калыкын культур поянлыкшым, йӱлажым, йылмыжым арален кодымо да вияҥдыме пашаште, мер толкыным вияҥдымаште самырык тукымын ойыртемалтше верым налын шогымыжым палемда. Самырык тукым – калыкын ончыкылыкшо. Сандене йылмым да кугезе йӱлам арален кодымаште кушкын толшо тукымлан поснак кугу ӱшан ышталтеш. Самырык тукымын социальный кӱлешлыкшым, йодмашыжым шуктымо дене кылдалтше йодыш-влак коклаште акрет годсо калыкын чыла тӱрлӧ поянлыкшым арален кодымаш да умбакыже пойдарымаш ик эн тӱҥлан шотлалтеш. Обществым умбакыже вияҥден толшашлан кугу шинчымашан, йол ӱмбалне пеҥгыдын шогышо самырык еҥ-влак кӱлыт. Кӱкшӧ сознаниян айдеме тӱняште шке вержым мушаш, шкенжын калыкше да кугезыже-влак дене кугешнышаш. Кызытсе тукым илышын ятыр ужашыштыже кугу кӱкшытыш шушаш верч тырша, чыла уым пален налаш да кучылташ кумылаҥеш, тудо шумо сеҥымашыж дене кугешнен кертеш.
Тидын годымак самырык еҥ-влак дене кылдалтше тургыжландарыше йодыш-влакат улыт. Тӱрлӧ амаллан кӧра самырык марий еҥ-влакын икмыняр ушемышт пашаштым луштареныт. Тачысе кечылан самырык-влак коклаште мер пашам шӱм-чон йодмо почеш шуктен шогышо еҥ шагал. Тӱшка пашаш ушнаш самырык еҥ-влакым кумылаҥден шогыман.
Марий калыкын Х погынжо ял калыкын илышыжын начареммыжым ик тӱҥ проблеме семын акла. Яллаште у паша вер-влакым почмаш, социальный инфраструктурым, тазалыкым аралыме системым вияҥдымаш ик эн тӱҥ задачылан шотлалтыт.
Чыла тидым шотыш налын, Марий калыкын Х погынжо темла:

организационный йодыш-влак шотышто

  • этнос-влак кокласе сӧрасен илымым поддержатлышашлан да кундемысе калыкым чак чумырышашлан, чыла калык ден этнический группо-влакын мер организацийыштын еҥыштым чумырен, Йошкар-Олаште погыным эртараш;
  •  тӱрлӧ йодышым ончылгоч каҥашен лекшашлан да утларак келшен толшо пунчалым ямдылышашлан Мер Каҥашын Председательже – Оньыжаже пелен экспертный советым ышташ, тушко эн пагалыме специалист-влакым чумыраш;
  • Мер Каҥашлан: - Марий калыкын ХI погыныштыжо приниматлышашлан Мер Каҥашын составшым чумырымо да тудын кажне членжын полномочий жапше ужашыште Мер Каҥашын уставышкыже вашталтышым пуртымо нерген йодышым каҥашен ямдылаш;
  • - марий мер организаций-влак дене, тидын шотыштак Марий Эл Республик деч ӧрдыжсӧ марий мер организаций-влак дене, пашам ыштыме тӱрлӧ йӧным кучылташ;
    - марий йылмым вияҥдыме йодыш-влак шотышто
  • марий йылмын кугыжаныш йылмылан шотлалтмыжым шотыш налын, Марий Эл Республикын Правительствылан марий йылмым республикысе чыла министерстве ден ведомствышто, чыла кугыжаныш учрежденийыште, транспортышто, кевытлаште да еҥ-влакын шуко лийман моло верыште кучылтмо сферым кумдаҥдаш йӧным ышташ;
  • Марий Эл Республикын Образований да науко министерствыжлан: - марий йоча-влакын тунемме да воспитатлалтме школ ден йочасадлаште шочмо йылмым туныктымо пашам вияҥден колташ;
    - образованийын региональный компонентшым вияҥдаш да тудым марий калыклан утларак келшен толшым ышташ;
    - марий йылме дене учебник-влакым савыктен лукташ бюджет оксам ситышын ойыраш;
    - учебно-методический пособий-влакым ямдылыме шотышто лабораторийым ыштыме нерген Марий калыкын IХ погынжын пунчалже дек пӧртылаш;
    - марий йылмым туныктышо-влаклан пашадарым тӱлымӧ фондым палемдыме годым инфляций кушмо кугытым шотыш налаш;
    - йочасадлаште марий йылмым тунеммым арален кодымо да вияҥдыме шотышто мероприятийлам ямдылаш, марий йылмым шочмо йылме семын тунемме группо-влакым почын кертме йӧным кычал муаш; нине йодышым эреак контрольышто кучаш;
    - Национальный президент интернат-школым марий йылмым, сылнымутан литературым, культурым да искусствым келгын шымлен тунемме рӱдерыш савыраш;
    - образований системыште ыштыше тӱрлӧ кӱкшытан вуйлатыше-влаклан образовательный учрежденийлаште воспитательный мероприятийлам лийме семын марий йылме дене эртараш;
    - чыла кӱкшытан общеобразовательный учрежденийлаште марий йылмым туныктымо электронный средствым шыҥдараш, марий электронный возыктышым вияҥдаш, электронный учебник-влакым лукташ бюджет оксам ситышын ойыраш;
    - образовательный учреждений вуйлатышын алмаштышыжлан шочмо марий йылмым шочмо да кугыжаныш йылме семын туныктымо, этнокультурым туныктымо йодыш-влакым пеҥгыдемден пуаш;
  • Тӱвыра, печать да национальность паша шотышто министерствылан:
    - марий электронный библиотекым ямдылыме пашам умбакыже шуяш;
    - марий йылмын кучылталтмыжым кумдаҥден колтышашлан, базовый инфраструктурым, компьютерный программный инструментарийым да информационный обществын электронный сервисшым марий йылме негызеш ыштышашлан информационный технологийым кучылташ йӧным ышташ шонымаш дене Марий Эл Республикын «Марий республиканский культур рӱдер» кугыжаныш бюджетный учрежденийже пелен марий йылмым да культурым инновационный йӧн дене вияҥдыме отделым ышташ, тидын годым тудын пашажлан келшен толшо финанс йӧным палемдаш;
  • Марий Эл Республикын Промышленность, транспорт да корно озанлык министерствыжлан корнысо указательлаште села, ял да эҥер-влакын марий лӱмыштым чын огыл возымым тӧрлаш;
    Марий кугыжаныш университетлан марий йылмым да тӱҥалтыш класслаште туныктышо чапле квалификациян специалист-влакым, дошкольный йоча учрежденийлаште марий йылмым палыше воспитатель-влакым ситышын ямдылаш;
  •  Марий Эл Республикысе чыла вузлан туныктымо чыла направлений дене образовательный программылашке «марий йылме» учебный дисциплиным пурташ;
  • марий мер организаций-влаклан:
    - марий йылмым, йӱлам арален кодымо да вияҥдыме пашаште, йоча-влакым кӱкшӧ мораль да нравственность негызеш шуарен куштымаште ешын рольжым нӧлтен толаш йӧным ышташ;
    - шочмо йылмым палаш да тунемаш кӱлмӧ нерген умылтарыме пашам ача-ава-влак коклаште вияҥден колташ;
  • Мер Каҥашлан: - Татарстан Республикыште Алабога муниципальный районысо «Кӱплык тӱҥ общеобразовательный школ» МБОУ-м арален кодаш кӱлмӧ, ты школым кыдалаш общеобразовательный школыш савырен кертме йӧным кычалме нерген ходатайство дене Татарстан Республикын Образований да науко министерствышкыже Марий калыкын Х погынжо лӱм дене лекташ;
    - Бирскысе филиалыште марий йылмым тунемме образовательный программе-влакым арален кодымо нерген ходатайство дене Башкир кугыжаныш университетым вуйлатыше-влак дек Марий калыкын Х погынжо лӱм дене лекташ;

марий тӱвыран йодышыжо-влак шотышто

  • Марий Эл Республикын Кугыжаныш Погынжылан национальность паша шотышто профильный комитетым ышташ;
  • Марий Эл Республикын Правительствыжлан:
    - Йошкар-Олаште марий калыкын лӱмлӧ эргыже-влаклан: композитор А.Я.Эшпайлан, поэт-новатор Валентин Колумблан, Марий автономный областьын икымше вуйлатышыже И.П.Петровлан памятникым ямдылаш да шогалташ;
    - Йошкар-Олаште Национальный стелым – Марий тӱнян рӱдолажын символжым шогалташ;
    - декоративно-прикладной искусствым вияҥдаш, кумыж гыч изделийым ыштыме, воштырым тодын тӱрлӧ сатум да тӱрлӧ национальный сувенирым ыштыме мастерской-влакым почаш йӧным муаш;
    - марий автор-влакын произведенийыштым савыктен лукташ, нунын музыкальный ден драматический произведенийлаштым театр сценылаште шындаш, художник ден фотограф-влакын выставкыштым организоватлаш йӧным ышташ;
    - марий йылме дене сылнымутан произведений-влакым савыктен лукташ бюджет оксам ойыраш;
    - Россий Федерацийын регионлаштыже марий-влакын тӱшка илыме верлаште улшо ялысе библиотеке-влаклан марий книгам, газет ден журналым ситараш верысе кугыжаныш орган-влак дене пырля йӧным муаш;
  • Марий Эл Республикын Строительство, архитектур да жилищно-коммунальный озанлык министерствыжлан, Йошкар-Олан администрацийжылан республикын рӱдӧ олажын архитектур тӱсышкыжӧ марий шӱлышым пурташ;
  • Марий Эл Республикыште да Россий Федерацийын регионлаштыже марий-влакын тӱшкан илыме верлаште кугыжаныш кучем орган-влаклан граждан-влакым кугыжаныш ден муниципальный кучем органлашке пашаш налме годым верысе калыкын чотшым шотыш налаш;
  •  Мер Каҥашлан: - Россий Федерацийын субъектлаштыже марий-влакын тӱшкан илыме кундемлаште марий калыкым арален кодымо да вияҥдыме шотышто ойым региональный программылашке пуртымо пашам вияҥден колташ;
    - Марий Эл Республикысе предприниматель-влакын ушемышт дене пырля марий калыкын культур поянлыкшым арален кодымо да вияҥдыме фондым ышташ;
    - Марий Эл Республикыште да Россий Федерацийын субъектлаштыже марий-влакын тӱшкан илыме кундемлаште илыше йоча-влакым шке калыкын культурыжым аклыме да йӧратыме шӱлышеш шуарен куштымо пашаште «Пеледше тукым» ден «Самырык тукым» творческий конкурс-влакын шуктен шогымо рольыштым да кӱлешан улмыштым шотыш налын, Республиканский марий культур рӱдер, Марий Эл Республикын Культур, печать да национальность паша шотышто министерствыже, Марий Эл Республикын Образований да науко министерствыже дене пырля тыгай конкурс-влакым эртарыме пашам умбакыже шуяш;
    - Марий Эл Республикын Культур, печать да национальность паша шотышто министерствыж дене пырля кугыжаныш, муниципальный да моло учреждений-влакын лӱмыштым возен сакыме да тыгай учреждений-влакын ончыл велыштым сылнештарен тӱзатыме годым марий орнаментым кучылтмылан поснак кугу тӱткышым ойыраш;
    - икымше марий газетым негызлыше П.П.Глезденёвын лӱмжым Йошкар-Оласе ик уремлан пуымо нерген ходатайство дене лекташ;
    - Марий Эл Респбуликын Мер-политик рӱдерыштыже Марий Мер Каҥашын айлыме пӧлемым «Марий калыкын общественный приёмныйжылан» шотлаш;
    - Кажне марий еҥлан Марий Эл Республикын рӱдӧ олажлан марий тӱсым пуымо да тудым марий тӱнян рӱдерышкыже савырыме пашаште чулымын тыршаш, кажне марий еҥлан тышке шке паша верыштыже шуктымо пашаж дене надырым пышташ, чулымлыкым ончыкташ;

массовый информаций средство-влакын йодышышт шотышто

  •  Марий Эл Республикын Правительствыжлан: - марий калык илыман кажне районышто марий йылме дене газетым лукташ йӧным муаш;
    республиканский марий газет ден журнал-влаклан оксам шукырак ойыраш;
    - Марий Эл Республикын Правительствыж пелен Марий Эл Республикын кугыжаныш йылмылашкыже кусарыме шотышто пашаче группым ышташ;
    - «Марий Эл» газет» ООО-м, «Кугарня» газет» ГУКП-м, «Ямде лий» газет» ГУКП-м, РМЭ-н «Марий книга издательстве» ИД» ГУКП-жым кугыжаныш бюджетный учрежденийыш савыраш;
    - марий йылмым, культурым, йӱлам да традицийым, марий калыкын шамжым арален кодымо да вияҥдыме пашаште марий национальный массовый информаций средстве-влакын пеш кугу надырыштым шотыш налын, тыгодымак редакций-влакын пашаштышт шижалтше нелылыкым кораҥдаш йӧным ыштышашлан газет ден журнал редакций-влакын темлыме ойыштым шотыш налын, Марий Эл Республикыште да Россий Федерацийын субъектлаштыже марий-влакын тӱшкан илыме кундемлаште исполнительный кучем орган-влак дене пырля пашам ышташ, газет ден журнал-влаклан подпискым ышташ кайыше роскотын ужашыжым региональный ден моло бюджет-влакын средствашт кӱшеш петыраш;
  • Россий Федерацийын субъектлаштыже марий-влакын тӱшкан илыме кундемласе кугыжаныш кучем орган-влаклан, Марий Эл Республикын Правительствыжлан газет ден журнал-влакым марий йылме дене савыктен лукташ ончыкыжат йӧным ыштен шогаш, марий йылме дене пашам ыштыше телестудий ден радиостанций-влаклан полшен шогаш, Россий Федерацийын пӱтынь кумдыкыштыжо Интернетын марий сегментшым вияҥдаш;
  • марий газет-влакын редакцийыштлан да Марий Мер Каҥашлан Марий автономный областьым ыштымылан 100 ий теммылан пӧлеклалтше мероприятийлашке чулымын ушнаш, федеральный ден региональный грант-влакым налшашлан конкурслаште участвоватлаш;

марий юмыйӱлан йодышыжо-влак шотышто

  • марий юмыйӱлам марий калыкын акрет годсек пагалыме да аклыме религийжылан шотлаш;
  • Марий Эл Республикын Правительствыж пеленсе Йылмым, литературым да историйым научнын шымлыше В.М.Васильев лӱмеш марий институтлан онаеҥ-влакын шымлыме пашаштым савыкташ йӧным ышташ, марий юмыйӱлам умбакыже вияҥдышашлан МарНИИ пелен марий юмыйӱлам шымлыме лабораторийым почаш;
  • марий юмыйӱлан актившылан школлаште марий религийым туныкташ тӱҥалаш программе ден учебник-влакым ямдылаш да савыктен лукташ;
  • Марий Эл Республикын Культур, пучать да национальность паша шотышто министерствыжлан «Культур наследий» программым шуктен толмо шот дене историй да пӱртӱс дене кылдалтше шарнымашан, шерге верже-влакым (ото, эҥер, ер, памаш, шӱгарла-влакым) шот дене да арулыкышто куча кӱлшӧ оксам ойыраш;
  • ӧрдыж кундемлаште марий-влакын тӱшкан илыме верлаште марий юмыйӱла шотышто районный ушем-влакым ышташ да вараже нуным федеральный кӱкшытыштӧ регистрироватлаш;

самырык-влак коклаште пашам ыштыме йодыш шотышто

  • Марий Эл Республикын Образований да науко министерствыжлан да Марий Эл Республикын Культур, пучать да национальность паша шотышто министерствыжлан Марий Мер Каҥаш дене пырля «Самырык лидерын школжо» кужу жаплык проектым илышыш шыҥдараш;
  •  кугыжаныш ден муниципальный кучем орган-влаклан самырык еҥ-влакым проектный пашаш ушаш, нунылан организационный да методический полышым пуэн шогаш;
  • кугыжаныш кучем орган ден мер организаций-влаклан марий йылмым, культурым, калык йӱлам арален кодымо да вияҥден толмо пашаште самырык тукымым тӧр праван партнёр семын аклаш;
  •  рвезе ден ӱдыр-влаклан илышыште шке верым муаш да шке шинчымашым, вий-куатым да йӧным шке калыкым вияҥдышашлан кучылташышт полшаш;
  •  марий йылмым, культурым, кугезе-влакын йӱлаштым арален кодышашлан да умбакыже вияҥдышашлан, таза илыш йӱлам калык коклаш шарышашлан, марий калыкым кӱкшӧ культур, мораль да нравственность негызеш шуарен вияҥдышашлан кугыжаныш ден мер пашаш у вийым ушен шогаш;
  • регион-влак коклаште кылым умбакыже пеҥгыдемден толшашлан марий молодёжын слётшым, йоча ден самырык-влакын тӱрлӧ погыныштым финн-угор калык-влак да Россий Федераций кӱкшытыштӧ ий еда эртараш;
  • марий калыкын ончыкылык илышыжлан йӧным ыштышашлан самырык-влак коклаште калыкын кугезе йӱлаже да культур поянлыкше дене кылдалтше шинчымашым шарен шогаш;
  • самырык тукымым мер-политик пашаш утларак чолган ушышашлан, молодёжный лидер-влакым ямдылышашлан ӱдыр ден рвезе-влаклан Молодёжный парламентыш, Общественный палатыш сайлалташышт полшаш, самырык еҥ-влакым марий мер толкыныш ушышашлан Марий Мер Каҥашын, «Марий национальный конгрессын», «Саскавий» марий ӱдырамаш ушемын, «ВийАр», «У вий» обществе да студент самоуправлений-влакын йӧныштым кучылташ;

ял илыш да йырым-йырысе пӱртӱсым аралыме шотышто

  • Марий Эл Республикын Правительствыжлан да республикысе муниципальный образований-влакын администрацийыштлан яллаште у паша вер-влакым почшашлан мерым ышташ;
  • Марий Эл Республикын Правительствыжлан да Россий Федерацийын субъектлаштыже марий-влакын тӱшкан илыме верлаште кучем орган-влаклан ял калыкын илышыжым аралыме пашам вияҥден колтымылан поснак кугу тӱткышым ойыраш, ялыште ФАП ден аптеке-влакым почаш региональный бюджетла гыч оксам утларак колташ;
  • этнотуризмым вияҥден толмым ял шотан илем-влакым вияҥдыме да марий калыкын этнический культурыжым Россий да тӱнямбал кӱкшытышкӧ лукмо резерв семын аклаш;
  •  калыкын илышыжым саемдышашлан мер организаций-влаклан йырым-йырысе пӱртӱсым арален шогымо пашам вияҥден колташ;
  • илем-влакым тӱзаташ ял калыкым утларак кумылаҥден шогышашлан республикысе районлаште да ӧрдыж кундемлаште марий-влакын тӱшкан илыме верлаште «Эн сайын тӱзатыме да яндар ял», «Эн сайын тӱзатыме да яндар сурт-пече» смотр-конкурс-влакым верысе исполнительный кучем орган-влак дене пырля эртараш.

М.Скобелевын фотожо;
«Марий Эл» газет марлаҥден/савыктен.

Текстыште йоҥылышым муында гын, пожалуйста, йоҥылышым палемден Ctrl+Enter темдалза.

ВАШМУТЫМ КОДЫЗА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.