Студент-влак «iВолга–2016» самырык-влаклан форумлан ямдылалтыт

0
72
гана онченыт

Марий кугыжаныш университетысе студент-влак кеҥеж тургымлан ямдылалтыт. Сессий деч вара нуно тӱрлӧ кӱкшытан форумлаште вийыштым тергаш тӱҥалыт. Ӱмаште нунын 7 проектышт грант дене палемдалтын. Тений, утларак сай лектышыш шуаш манын, эше ий тӱҥалтыштак Проектирований школым почмо. Тудым йот йылме-влак факультетын студентше Константин Арон вуйлата, шкеже кодшо кеҥежым 700 тӱжем теҥгеаш 3 грантым сеҥен налын. Проектирований школыш 80 студент ушнен. Тушто проектлан темым ойыраш полшат, кузе возаш да аралаш туныктат. 
Кызыт МарГУ-со студент-влак «iВолга–2016» регион-влак кокласе молодежный форумлан ямдылалтыт. Тудо 15 гыч 25 июнь марте Самара областьыште эрта, тушко пӱтынь Юл кундемысе федерал округ гыч вузлаште тунемше-влак погынат. Тушто 9 смене пашаш ышташ тӱҥалеш. Университетын студент-влак 4 тылзе жапыште проектым ямлылыме пашам шуктеныт: вӱдышӧ эксперт-влак мастер класс ден тренинглам, консультаций ден мозговой штурмлам эртареныт. Лектышыштат куандарыше: форумын официальный сайтыштыже МарГУ деч чыла направлений дене 75 проектым регистрироватлыме. «Инноваций да технический творчестве» направлений дене – 7, «Спортивный молодежь – таза наций» – 12, «Тый – предприниматель» – 14, «Медиаволна» – 10, «Политике» – 4 проект да молат.
20 май деч вара регионысо экспертный комиссий «iВолга–2016» форумышто участвоватлаш эн сай проект-влакым ойырен налеш.

Леонид Гимев

Текстыште йоҥылышым муында гын, пожалуйста, йоҥылышым палемден Ctrl+Enter темдалза.

ВАШМУТЫМ КОДЫЗА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.