Марий кугыжаныш университет 85 ияш лӱмгечыжым сай лектыш да у сеҥымаш дене вашлиеш. Тудо Йошкар-Оласе Полупроводник прибор заводын стратегический партнержо. Сандене тудын негызеш тенгече микроэлектроникылан керамический изделий-влакым конструироватлыме да ыштен лукмо кафедрым почмо.
Кодшо ийын МарГУ «Оборонно-промышленный комплекслан у кадрым» Россий кӱкшытан конкурсышто сеҥышыш лектын да 50 миллион теҥгеаш грантым налын. Тиде проект кӱшеш лач Полупроводник прибор завод негызеш у базовый кафедре пашаш шогалеш.  А факультетыште тунемме аудиторий ден лабораторий-влак у оборудований дене пойдарадтыт. Каласыман, ЗПП интегральный микросхеме ден полупроводник прибор-влаклан металлокерамический корпус-влакым ямдылымаште Российысе чумыр кугытын 60 процентшым айла.
«Ме кажне ийын заводышко, поснак технологический производствыш 15 еҥым налын кертына. Завод ден вузын специалист-влакым пырля ямдылымышт – тиде предприятийын стратегический кадровый политикыже», — ойла ЗПП-н генеральный директоржо Александр Крайнев.
Палемдыман, у кафедрыште студент-влакым заводышто пашам ыштыше-влак веле огыл, тыгак преподаватель-шамычат туныкташ тӱҥалыт. Шукерте огыл нуно профессиональный сертификационный экзаменым кученыт.
Кафедре почмо годым физматын студенткыже Мария Литвиненко тыге каласыш: «Тыште теорий шинчымашым практике дене пеҥгыдемдаш сай йӧн уло. Кызытсе жаплан келшыше чапле оборудованийым вераҥдыме. Мыланна кӱкшӧ квалификациян специалист лияш чыла йӧн ышталтын».
Мучашлан завод ден вузышто пырля кадрым ямдылаш манын, пашаче туныктымо программым пенгыдемдыме.

Леонид Гимев

ВАШМУТЫМ КОДАШ

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.