Марий кугыжаныш университетлан да республикысе кӱшыл шинчымаш системылан 85 ий темме лӱмеш торжественный погын эртен. Тушто Марий Эл Республик вуйлатыше Леонид Маркелов лийын. Шке саламлыме мутыштыжо тудо республике илышыште, экономикылан кадрым ямдылымаште вузын рольжым к¢кшын аклен, университетлан умбакыже вияҥаш, регионлан кӱлшӧ у специальность ден направленийлам почаш полшаш палемден. Леонид Игоревич вузын преподавательже ден сотрудникше-влаклан правительствын 7 наградыжым кучыктен.
Погын жапыште «МарГУ: эртыме корно, тачысе кече, ончыкылык» фильмын презентацийже лийын. Тудым лӱмын вузын пайремлан ямдылыме. Уна-влак ончылно «Университет» группо шке мастарлыкшым ончыктен, «Йошкар-Ола» – самырык-влакын гимныштым мурен.
Торжественный заседанийыште финн-угор да пошкудо вузла гыч уна-влак лийыныт. Тиде ректор-влак – Н.П. Огарёв лӱмеш Национальный исследовательский Мордва кугыжаныш университет гыч Сергей Вдовин, И.Н. Ульянов лӱмеш Чуваш кугыжаныш университет гыч Андрей Александров, Чебоксар кооперативный институт гыч Валерий Андреев, МОСИ гыч Игорь Загайнов. Тыгак саламлыме мутым ПГТУ-н икымше проректоржо Виктор Шебашев, «Финн-угор калык-влакын поянлыкышт» III Тӱнямбал студент форумыш толшо вузлан представительышт ойленыт.
Пайрем погынышто «Марий кугыжаныш университетын Почетан профессоржо» удостоверенийым филологий науко доктор Наталья Глуховалан да историй науко доктор Ананий Ивановлан кучыктымо. Тыгак МарГУ-н чап грамотшым 42 преподаватель ден сотрудниклан, тауштыман серышым студент-влаклан пуымо.
Лӱмгече кас Эрик Сапаев лӱмеш Марий кугыжаныш опер да балет театрыште пайрем концерт дене мучашлалтын.
Леонид Гимаев