Элыштына Российысе кино идалыклан пӧлеклалтше ятыр мероприятий эртаралтеш. Морко районысо Унчо кундемыште «УнчоFest» лагерь-семинар шке пашажым тӱҥалын. Участник-влак коклаште кумло наре журналист, оператор да кинолан шӱмаҥше улыт. Кок кече жапыште участник-влак усталык пашам – кӱчык фильмым ямдылат. Лагерь-семинар жапыште сценарийым возымо, съёмкым организоватлыме, режиссёрын пашаже нерген мастар-класс-влак эртат. «Лагерь-семинарна документальный, кино да телевиденийлан кумылаҥдыме шонымаш дене эрта. Тиде кином йӧратыше-влаклан шкешотан усталык площадке. Участник ден уна-влак тӱвыра да шинчымаш программе деч посна марий калыкнан тӱвыра ден йӱлаже дене палыме лийыт», – палемда проектын авторжо Алёна Иванова. Семинарын партнёржо семын «М-тур» турагенстве, «Амарис» мебель салон (директор О.Б. Аптышева), «Семёновский» племзавод (директор А.С. Козырев), «Икымше май» колхоз (председатель А.А. Новиков), М.Шкетан лӱмеш марий кугыжаныш драме театр (директор М.И. Матвеев), Тимофей Евсеев лӱмеш калыкле тоштер (директор Л.Н. Смирнова), Российысе калык фронт (исполком вуйлатыше Н.В. Ефремова), ООО «Алексия» (директор Н. С. Морозова), Шернурысо сыр завод (директор А.А. Емельянов), керамике дене сӱретче Полина Метелькова, ООО «Лаюш» (директор В.В. Марков), ЛДПР чолга еҥже-влак (Кирилл Писный), амалкалче Матвеев В.В., Россий Федерацийын Кугыжаныш Думын депутатше, Еш, ӱдырамаш да йоча йодыш шотышто комитетын вуйлатышын алмаштышыже Л.Н. Яковлева, «Марий Эл» Кугыжаныш Теле да радио компаний. Форумым Марий Элысе «ВийАр» тӱвыра да келшымаш кыл шотышто мер ушем, Морко район Унчысо этнокультур комплекс, «Кидшер» интернет-журнал, «Марий Эл» кугыжаныш теле да радио компаний Марий Элысе тӱвыра, печать да калык-вакын пашашт шотышто министерстве полшымо дене эртара. Палемдыман, участник-влак коклаште икмыняр конкурс-влак эрташ тӱҥалыт. Сеҥыше-влакым 11 июльышто пален налына.
