Ий полат — шокшо кумыл

0
269

Кодшо шуматкечын «Марий Эл» ий полатыште «Марий Эл Радион» шочмо кечыжлан пӧлеклалтше черетан кугу пайрем эртыш. 3 шагат утла шуйнышо концерт тиде гана Российыште увертарыме Кинон идалыкшылан пӧлеклалтын. Мурызо-влак Васли Ольош, Нина Зорина, Маргарита Синуткина, «Какшан сем» ансамбль, самырык мурызо Ксюша Черёмушкина радион концертыштыже икымше гана муреныт да калыкын кумылжым савырен моштеныт. Сцене, декораций, вӱдышӧ да артист-влакын костюмышт мероприятийыш волгыдо тӱсым пуртеныт. Тӧрсыр-влакымат палемдыде кодаш огеш лий: икмыняр «технике» йодышым концерт тӱёҥалмек  шотыш кондаш логале. Ий полатысе моло экшык-влаклан «Марий Эл Радио» вуйын ок шого гынат, калыкын умылымыжлан да мелын шогымыжлан таум ойла. 
Концерт дек куснаш гын, сценарий тыгай: радион шочмо кечыжым пайремлаш чумыргышо-влакым Мурызо Эчан моткоч оҥай «авантюрлан» тарвата - шкем тӱрлӧ кинообразыште терген ончаш темла. Молышт келшат да концерт кайыме жапыште тӱрлӧ образ дене калык ончыко лектын куандарат, воштылтат, кокланже ӧрыктарат. Мутлан, рвезе-влакын «Джентельмены удачи» киносо семын ковала чиен лекмышт, ий ӱмбалне зарядкым ыштен куржталмышт калыклан оҥайын чучын. Але «Операция Ы» кино гыч Трус, Балбес да Бывалый зал гыч еҥым луктын, тудын дене модмашым эртарат, а вара ӱдырым шолышташ шонен пыштат да йоҥылыш мешакыште мурызо Йорга Качым нумал луктыт. «Кавказская пленница», «Любовь и голуби», «Иван Васильевич меняет профессию», «Девчата», «Королева бензоколонки» да моло фильм-шамыч гычат образ-влакым ончаш толшо калык вигак тогдайыш. Мутат уке, уло сюжет радион илышыже йыр пӧрдын. Вӱдышӧ-влакын шкеныштым шке койдарен воштылын моштымыштат калыклан келшен. Концертыште отечественный гына огыл, марий кино-влак да киноартист-влак нергенат палдарен кодышт. Йыван Кырла, Валентина Смирнова, Василий Домрачев, Светлана Строганова да молат шке мастарлыкышт дене да кинолаште устан модмышт дене марий калыкнам чапландареныт. Мучаште радиовӱдышӧ-влак ик ойыш шуыт: радио паша – нунын шӱлышышт, куанышт, пиалышт, радио деч посна нуно иленжат огыт керт…
Икманаш, у мурызо да у муро, у шӱлыш да у образ-влак калыкын кумылжым савырен кертыныт манын ӱшаныме шуэш. Шушаш жапыште тиде концертын видеоверсийжым DVD дискыште ончен кертыда.

марий эл радио концерт 2016 11 ий фото

ПАЛДАРАШ
viktaryshe

«Кидшер» интернет-журналын увер службыжо.

Увер ден материалда-влакым info@kidsher.ru электрон почто дене вучена.

ШОНЫМАШДАМ КОДЫЗА:

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.