Кылым пенгыдемдат, уш-акылым пойдарат

Кино, эстонияМарий Элысе «ВийАр» тӱвыра да келшымаш кыл шотышто регионысо мер ушем черетан погынымашым эртарен. Ушемын еҥже-влак кеҥеж жапыште шуктымо сомылым иктешленыт да ончыкылыклан паша планым пеҥгыдемденыт.
Кеҥеж – каныш пагыт гынат, самырык чолгаеҥ-влакын паша лектыш дене палдарыме, шинчымашым пойдарыме, кылым пеҥгыдемдыме жап. Россий мучко да Марий Элыштынат самырык тукымлан пӧлеклалтше ятыр мероприятий эртен. Икмынярышкыже ушемын еҥже-влак чолган ушненыт. 
Кеҥеж жапыште ушемын эртарыме ик эн кугу мероприятийлан «УнчоFest» лагерь-семинарым шотлыман. Ушештарена, тудо Морко районысо Унчо ялыште 9 гыч 11 июль марте шуйнен. Российсе кино идалыклан пӧлеклалтше мероприятийыш республикынан Волжск, Курыкмарий, Звенигово, Марий Турек, Морко, Шернур, Куженер, У Торъял, Параньга районла да Удмурт Республике, Ханты-Мансийский автономный округ, Санкт-Петербург да Эстоний гыч кумло наре еҥ чумырген. Самырык чолгаеҥ-влак кеч шочмо кундем деч тораште илат гынат, кумылын лагерь-семинарын пашашкыже ушненыт. Кугыеҥ-влакын кино аланыште усталык пашаштым аклен, самырык-влак шукылан тунемыныт. Кином йӧратыше да шкештак тудым ямдылыше-влак икте-весышт дене палыме лийыныт, тӱрлӧ ийлаште ямдылыме паша-влакым онченыт, видеоматериал-влакым ямдыленыт, архивым чумыреныт.
УнчоFest1Лагерь-семинар деч вара икмыняр еҥ Эстонийыште эртаралтше кинокурсыш миен. Ончыкшым родо-тукым калык-влакын кинофондышт дене кыл эшеат пеҥгыде лиеш, шонена. Кинокурсым эртарымашке кугу надырым мемнан поро йолташна, «ВийАр» ушемын еҥже Татьяна Алыбина пыштен.
Тидын годымак, ВийАрын еҥже-влак Алёна Иванова ден Надежда Ильина Дагестаныште, Каспий теҥыз воктене эртыше «Кавказ: наследие» лӱман исторический форумын участникше лийыныт. Чылаже тушто Российын 40 кундемже гыч 150 самырык ӱдыр-рвезе погынен.
Идылык тӱҥалтыште «ВийАр» ушем «Россий Президентын 85 йолташыже» акцийыш ушнен. Иктешлымаш семын лишыл пагытыште «Молодежная атмосфера» ушем вес мероприятийым эртара. Тушкат марий ӱдыр-рвезе-влак ушнат.
Шыжым ушемын еҥже-влак Российысе кино идалыклан пӧлеклалтше мероприятийым, терроризм ваштареш кучедалме акцийым эртараш палемденыт.

Кидшер
Шонымашым ешараш