Мо дене 2016 ий шарнымашеш кодеш?

0
27
гана онченыт

2016 ийИдалык мучашке лишемеш. «Кидшер» интернет-журналын лудшыжо-влак кузе эртыше ийым ужатат? Могай иктешлымашым ыштат? Толшаш идалык деч мом вучат?

Евгения Ёлкина, студент:
Мутат уке, тиде ий вес моло ий-влак семынак, писын эртен кайыш. Идалык жапыште тӱрлыжат лиеден. Тиде ийын шканем шындыме икмыняр цельыш шуынам, шуко шонымо пашам ышталтыныт. Кеч йӱштӧ-шокшыжат лийын гынат, вуем сакаш ом вашке. Ӱшанен кодам, толшаш идалык чыла сайым гына конда.

Раисия Сунгурова, самырык поэтессе:
Сургут марий-влак эртыше идалыкым 17-ше декабрьыштак «У ий марий касым» эртарен ужатышна. Марий Йӱштӧ кочай ден Лум ӱдыр денат вашлийна, иктешлымашымат ыштышна. «Марий ушемна» тений Сургут олаштына спорт дене кылым кучымыжо дене ойыртемалтын. Тиде идалык мучко верысе калыкле организаций-влак коклаште эртыше турло модыш-влакым иктешлымаште кумышо почётан вер. Ушештарем, олаштына чылаже 25 этнический ушем уло. Ондакысе ийлаште марий йылмым аралымаш да культурым вияҥдымаш пашам изин ма, кугун ма наҥгаенна гын, шушаш ий гыч спорт да тазалык илыш верч пашаланат тӱткышым ойыраш тӱҥалына. Ӱшанена шушаш У ийын марий шӱлышан у самырык еҥ-влак ушемышкына ушнат манын.
Посна шке гыч пелешташ гын, ты ий пеш нугыдын эртен. Йот элышкат тунемаш мияш логалын, у книгамым калык ончылно презентоватлыме. «Чайгоркаште сандалык» йот эл да шкенан республикысе премий-влак дене палемдалтын. Шукерте огыл, эше ик сылнымут лектышлан проектым проддерживатлыме уверым нальым. Чыла тидым лектышлан шотлем да тунамак ончыкылыклан шке могырым кугу ответственностьлан. Садлан толшаш идалык деч вучем ончыкылык пашам шукташлан ситыше вийым да ушым. А эше, эргым, ешем, йолташем, лудшем-влаклан да чыла марий калыклан тыланем таза, пеҥгыдыде, чулым лияш да тӱжӧ – шке калыкле самосознанийым йомдараш огыл, лудаш «Кидшер» интернет-журналым, илышын толкынжо гыч ӧрдыжеш кодаш огыл.

Наталья Венина, туныктышо:
2016 ийысе событий-влак мылам пеш келшат: Коми Республикысе Ухта олашке илаш кусненам. Шканем сай пашам муынам - йоча-влакым туныктем, видеом возымаште ончыко ошкылым ыштенам. Мутат уке,  койыш-шоктышат вашталтын. Сергей Иванов дене пырля ноябрь мучаште «Марий йылме пелед» проект дене пашам тӱҥална. У ийым вашлияш мӧҥгӧ толам. 2016 ийысе чыла событий да мыйын йыр лийше калыклан пеш кугу таум ойлем. Шушаш 2017 ий деч мыйын икмыняр шонымаш шукталтмым вучем. План шуко!

Текстыште йоҥылышым муында гын, пожалуйста, йоҥылышым палемден Ctrl+Enter темдалза.

ВАШМУТЫМ КОДЫЗА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.