Пантелей Петровичын приемныйжо, але «Воштылаш, товатат, сулык огыл» конкурсын лектышыже

0
338

1 апрельыште М.Шкетан лӱмеш марий кугыжаныш драме театрыште «Воштылаш, товатат, сулык огыл» мыскара конкурсна ик шӱлыш дене эртыш, манаш лиеш. Калык зал тич лийын, билет ончылгоч пытымылан кӧра шукынжо ончыде кодыныт. 
Йӱлашке пурышо пайрем кас оҥай, утен каен воштылмеш куандарыше лийже манын, шагал огыл вийым пыштенна. Март мучко районлашке лектын коштынна, отборочный тур-влакым эртаренна да эн сайлан шотлымо номер-влакым конкурсышко конденна.
Чылаже 17 номер ыле. Кажныштыже келшыше темым тарватыме, уто-сите койышым койдарыме, шонымашым мыскара гоч сайын почын пуымо. Тыге Морко, Волжский, Провой, У Торъял, Кужэҥер, Советский, Оршанке, Медведево районла гыч да Йошкар-Ола гыч тӱрлӧ ийготан 70 наре участник мастарлыкшым ончыктен.

Конкурсышто сеҥыше-влак кумшо, кокымшо, икымше вер-влак дене, «Мыскара муро» номинаций да ончаш толшо-влакын кумылаҥдыше призышт дене палемдалтыныт. Тидыже конкурсын у положенийже дене келшышын, ӱчашымашын вийжым, таҥасымашын кӱкшытшым нӧлталме верч ышталтын.
Ончаш толшо-влакым Морко район Унчо гыч «Унчо вий» коллектив «Рвезылыкым шарналтена», Оршанке район Пуял клуб «Реве», Провой кундем Эсмекпляк тӱвыра пӧртын пашаеҥышт «Пляжыште», Волжский районысо Сотнур йочасадын коллективше «Тулартымаш», Провой вел Красногорский посёлко гыч Зоя Иванова ден Нина Зорина «Медицине салонышто», Морко тӱвыра полат пеленысе образцовый лӱмым нумалше йоча театр «Чылажат «П» буква гыч, але Пантелей Петровичын приемныйжо», Морко район Тыгыде Морко гыч «Йорга каче-влак» дуэт «Мӱй пӱрӧ», «Марий подкогыльо» каманде «Пенсий бум» сценкышт дене чот воштылтеныт. Кужэҥер гыч Эльвира Егорова («Марлан омак кай»), Медведево район гыч Михаил Зверев-Арбан, Советский район гыч Вера Горохова «Марий дискотеке гыч толам», Морко район гыч Эдуард Крижановский «Москваште пашам кычалам» монологым лудыныт. Журналист-влак Денис Очиев ден Игорь Попов гитар почеш шоктен муреныт, тыгак икмыняр мурылан пародий сынан кӱчык клипым келыштареныт. Видеороликым экран гоч ончаш темленыт. Волжский район Карай театр, У Торъял район гыч Анатолий Никитин, Советский район гыч «Кундыш сем» ансамбль да МарГУ-н мурышо да куштышо «Марий мурсем» ансамбльже мыскара муро-влакым муралтышт.

Жюри кумшо вер дене Вера Гороховам палемден, тудлан кок тӱжем теҥге оксам кучыктен. Кокымшо верыш Волжский район Сотнур йочасадын коллективше лектын да кум тӱжем теҥге окса премий дене палемдалтын. Икымше верым да вич тӱжем теҥге окса премийым Морко районысо йоча театр коллективлан пуымо. Ынде кок ий почела Марий Эл тӱвыран сулло пашаеҥже Анна Якушеван вуйлатыме театр сеҥыше радамыш лектеш. «Мыскара муро» номинацийыште Советский район «Кундыш сем» ансамбль ойыртемалтын.
Мыскара кас тӱҥалме деч ончыч кажне номерым М.Шкетан лӱмеш театрын тӱҥ режиссержо Роман Алексеев ончен, терген да ой-каҥашым пуэн. Тудлан кугу таум каласена. Тыгак театрын артистше-влак Александр Бирюков ден Андрей Бусыгин касым пеш мастарын вӱденыт, ОМОН-орол ден ялысе гармонист весела еҥын образыштым моштен чоҥеныт.
Марий Элын сулло артистше, Йоча да самырык-влаклан рӱдер-театрын актержо Евгений Ибраев приз-сюрпризым, тенийысе идалыкын символжым – агытаным – Морко районысо «Унчо вий» коллективлан кучыктен. Чынак, тушеч толшо мыскараче-шамыч еҥ-влакын кумылыштым чот савырен моштеныт.
Концерт программым Марий тӱвыра рӱдер пеленысе «Чон оҥгыр» ансамбль (вуйлатышыже Эльвира Петрова), мурызо Татьяна Умурбаева да «Марий мурсем» ансамбль сӧрастареныт.
Мыскара жанрым илышыште шыҥдарыме да тудым вияҥдыме шотышто «Кугарня» редакций кугу сомылым шукта. Режиссер дене пырля пашам ыштыме деч вара сай номерым «кӱктышӧ» ямде артист-влак кеч-могай мероприятийыште шке усталыкыштым ончыктен кертыт. «Воштылаш, товатат, сулык огыл» мыскара касым эртарен колташ полшымыжлан М.Шкетан лӱмеш марий кугыжаныш драме театрын директоржо Михаил Матвеевлан кугу таум каласена.
Мыскара касыштына кӧ чон шулдыржым кӱш нӧлталын гын, тудден пырля меат куанена. Газетым луктын шогымо паша деч посна уло моштымынам тиде кугу мероприятийым эртарен колтымашке пыштенна. Калык кокланже кӱдырчӧ рашкалтымыла чот воштылын, куан кумыл дене совым рӱж кырен. Тугеже паша лектышна арам лийын огыл, шонена.

Татьяна Пчёлкина
Иван Речкинын фотожо-влак

Текстыште йоҥылышым муында гын, пожалуйста, йоҥылышым палемден Ctrl+Enter темдалза.

ОСТАВЬТЕ ОТВЕТ

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.