Йошкар-Олаште «Ӱдырсий» республикысе конкурс эртыш

0
366

Марий ӱдыр-влак эн сылне, эн мотор, эн чевер, эн лывырге, эн ушат улыт. Но нунын кокла гычат эн-энжым ойырен налаш манын, 29 октябрьыште Йоча да самырык-влаклан театр-рӱдерыште «Ӱдырсий» республикысе конкурс эртыш. 

Тушко Пошкырт кундемын чолга ӱдыржӧ Лариса Ипулаева, Марий Турекыште шочын-кушшо Елена Хлебова, ты районысо Арбор кундемын ӱдыржӧ Кристина Кутузова, Курыкмарий район Картук ял гыч Валентина Петрова, Морко районысо Марий Кужер ялын ӱдыржӧ Виолетта Георгиева, Оршанке район Пуял гыч Марина Ведерникова да Провой вел Эсмекпляк гыч Ксения Григорьева ушненыт.

«Марий ӱдыр мый улам» - тыге маналтын икымше конкурс. Ӱдыр-влак, тӱрлӧ йӧным кучылтын, шкешт дене палдарышт. Тыгодым иктышт мурышт, куштышт, а весышт, шке кундемыштым моктен, сылнымут корнылам йоҥгалтарышт.

Курыкмарий ӱдыр Валентина Петрова моткоч оҥай сценкым модын ончыктымыж дене кумылым нӧлтыш: ялысе ӱдыр пуйто олашке тунемаш пураш толеш да рвезым вашлиеш. Ӱдыр куанымыж дене йӱкын мутлана. А рвезе, ӧрынрак, молан тыгай весела улмыжым пален налнеже улмаш. «Сусу улам!» - манеш ӱдыр, вет тудо олашке толын. Валя мурен, кӓршым шоктен, эсогыл пӱкеныште куштен моштымыж дене ӧрыктарыш. Чон-шижмашым, куаным чылт артист гаяк ончыктен керте, воштылтыш.

Марий калыкна поян тӱвыраже, илыш-йӱлаже денат ойыртемалтеш. Тудым кундемыштына илыше кугурак-влак сайын палат. Тидлан кушкын толшо тукымымат изинекак шӱмаҥдыман. Тиде амал денак «Ӱдырсий» пайремын кокымшо конкурсыштыжо ӱдыр-влак йӱлам палымыштым ончыктышт. Марина Ведерникова йолташыже-влак дене пырля шинчымаш касыште кидпашам ыштышт, шергашым шылтен модыч, а Лариса Ипулаева ӱдырйӱышыш йолташыже-влакым чумырыш. Кристина Кутузова дене Елена Хлебова Шорыкйол пайремын ужашыжым модын ончыктышт. Тыгодым нуно ӱштӧ дене мужедыч, капка гыч портышкемым кышкышт, печым ӧндалын, качыжын поян але нужна улмыжым пален нальыч, пычкемыш мончаштат, сортам йӱлалтен, ончыкылык пелашын чурийжым ончышт.

Ксения Григорьеван Пӱртӱс Ава деке «йылмым» йодын мийыме йӱлажат шуко уым пален налаш полшыш. Залыште шинчыше-влакат тидым моткоч тӱткын колыштыч. Изи йоча кужу жап огеш мутлане гын, памаш воктеке миен, кидым-шӱргым шӱялтеныт да Пӱртӱс Авалан пелештеныт: «Пӱртӱсыштӧ чыла чонан-влак икте-весышт дене мутланат. Теве кайык-влакат чарныде вычыматат, пушеҥгыште лышташ-влакат шыве-шыве кутырат, вӱд ӱмбалне куржталше вӱдтолкын-влакат юарлен куржталыт. Мемнан ик изи ӱдырнан веле йылмыже уке, йомдарен. Пӱртӱс Ава, полшо!»

Виолетта у шурно дене киндым пыштыме, тыгодым могай ойӧрым шуктымо нерген каласкалыш веле огыл, у кинде денат зал калыкым сийлыш.

Курыкмарий кундем ковыштам ончен-куштымо дене ойыртемалтеш. Тушто илыше-влак Ковышта руымо айом ожнысекак пайремлат улмаш. Айо годым ӱдыр-рвезе-влак, тӱшкан погынен, пашам ыштеныт, муреныт, куштеныт, модын-юарленыт. Тидын дене Валентина Петрова палдарыш.

Уш-акыл поянлыкым тергыме конкурслан ямдылыме йодыш-влакат тургыжландарышт, шонаш таратышт. Конкурсант-влак марий калыкын пайремже ден йӱлаже, семӱзгарже-влак дене кылдалтше йодыш-шамычлан вашмутым кычальыч.

Этномодо конкурслан ӱдыр-влак, сылне марий вургемым чиен, сценыште моторын ошкыльыч, чылт ош йӱксыла койыч. Варажым ваштарешышт лекше рвезылан солыкым кучыктышт да пырля ошкыл эртышт.

Конкурсышто ӱдыр-влакын мастарлыкыштым жюри аклен. Нуно тыгай номинацийыште сеҥыше-влакым палемдышт:

  • «Марий ӱдыр — йӱлам палыше ӱдыр» - Елена Хлебова
  • «Марий ӱдыр - лывырге ӱдыр» - Марина Ведерникова;
  • «Марий ӱдыр - сылне ӱдыр» - Кристина Кутузова;
  • «Марий ӱдыр – мастар ӱдыр» - Ксениия Григорьева;
  • «Марий ӱдыр – весела ӱдыр» - Виолетта Георгиева;
  • «Марий Пампалче» - Валентина Петрова.

«Ӱдырсий» конкурс деч ончыч Марий тӱвыра рӱдерын сайтыштыже ӱдыр-влак верч йӱклымаш эртен. Тушто Елена Хлебова эн шуко йӱкым поген.

Пайремым «Марий Эл», «Юкече» ансамбль-влак, мурызо Станислав Устюгов, Светлана Яндукова, Геннадий Григорьев, Валерий Чиванов да гармоньчо Эльвира Петрова сылне мурышт да куштымашашт дене сӧрастарышт. Йошкар-Ола воктенсе воинский часть гыч мураш толшо салтак Инфас Хамидуллинат пайрем кумылым нӧлтыш.

Алевтина Байкова.
Д.Речкинын фотожо.
«Марий Эл» газет.

ПАЛДАРАШ
viktaryshe

«Кидшер» интернет-журналын увер службыжо.

Увер ден материалда-влакым info@kidsher.ru электрон почто дене вучена.

ШОНЫМАШДАМ КОДЫЗА:

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.