Мурызо Виктор Апталиков: «Мурат «тамле» лийшаш»

0
65

Мурымыжо ойыртемалтше, шыма да чонлан келшыше. Мутем — талантан рвезе, йӧратыме эрге, композитор, актёр да мурызо Виктор Апталиков (Аptalik) нерген. Виктор калыклан у лӱм огыл. Эше Йошкар-Оласе 18-ше ден 27-ше №-ан школлаште тунеммыж годымак рвезе мурылан шӱмаҥын. Варажым И.С.Палантай лӱмеш тӱвыра да сымыктыш колледжыште, ГИТИС-ыште тунемын. Москонцертыште, М.Шкетан лӱмеш Марий кугыжаныш драме театрыште, Республикысе йоча да самырык-влаклан театр-рӱдерыште ӱжмӧ артист семын пашам ыштен. Кузерак самырык мурызо ила? Могай пашам кызыт шукта? Нине да моло йодышлан вашмутым шкеж деч йодна. 

- Виктор, пытартыш жапыште мурсаскат поснак ойыртемалтше: рэпым лудат, муро стиль ден мурыметат шкешотан улыт.

- Тидлан кок амалым палемдаш лиеш. Иктыже - калык мыйым классике мурым мурышо семын ужаш тунемын, а весыже - вес жанр дене мурымо гоч ойлынем: классикым йоҥгалтарыше вес жанр денат мурен кертеш. Мый тӱрлӧ мурым йӧратыше улам, лийже тиде классике, рэп але поп… Тӱҥжӧ - калыклан «тамле» лийже. Шканем шукертак тыгай мурым ышташ палемденам, кудыжо лач мылам да калыклан колышташ оҥай лиеш. Мурым шочыктымо жапыштак у сынан да форматан марий мурым умбакыжат кычалам. Кунам мурем колыштшо-влаклан келша, тунам чонемлан сай. Тидыже умбакыжат пашам ышташ кумылым луктеш.

- Шекланенам, кызыт тыйым сценышке чӱчкыдын Aptalik лӱм дене ӱжыт. Сценылык лӱм кузе шочын? Мо дене тиде кылдалтын?

- Сценылык лӱм пеш оҥайын шочын. Икана ялыште эртыше концертыште кова мыйым шуко жап шонкален ончен. Варажым, мый декем лишеммек, «Тый вет Апталик улат?» манын йодын. Тылеч вара мый шканем тиде лӱмым налынам. Тиде кокымшо мый. Виктор Апталиковым калык классике мурызо семын пала гын, Аptalik - тиде уым шыҥдарыше, экспериментироватлыше еҥ.

- Виктор, икымше муретым, икымше гана сценыш лекметым шарнет мо?

- Икымше гана сценышке 18-ше №-ан школышто 3-шо але 5-ше классыште тунемме годым лектынам. Тунам мый «На-на» группын «Барбара» мурыжым йоҥгалтаренам, конкурсын лауреатше лийы- нам. Тылеч вара шкемым муро дене кылденам.

- Тачысе кечылан репертуарыштет мыняр муро уло?

- Шукыжак огыл. Эн тӱҥжӧ - мурын качествыже лийже, вет кажне муро — чонын ужашыже, тудым ыштышаш йоча семынак нумал коштман, ош тӱнялан пӧлеклыман. Сай качестваным колышташ туныктыман. Эстрадыште шуко муро уло, но тудын тамжым калыклан шуктышыжо шукак огыл. Сандене репертуарым тунар пойдараш ом толаше, качестве да чон гыч лекше муро нерген шонем.

- Могай йылме дене тылат мураш чотрак келша?

- Марий йылме дене, но шке кӧргӧ чоншижмашым тӱрыс почын пуаш куштылгыжак огыл. Рэпым возымо годым тиде сайынак шижалте. Руш йылме дене тидым ышташ куштылгырак, но марий йылме шке сылне семже дене путырак чот келша.

- Яра жапетым кузе эртарет?

- Яра жапем мурылан пӧлеклем. Тидын годымак сылнымутлан жапым ойырем: Иван Тургеневым, Анна Ахматовам, Сергей Есениным, Александр Блокым лудам. Тиддеч посна телевизор дене драмым але комедийым ончаш, лишыл-влак дене чон почын мутланаш, тӱрлым шонкалаш йӧратем.

- Лишыл жапыште калыкым иктаж у муро дене ала куандарет?

- Лач кызыт усталык экспериментем-влак почеш у мурсаска шочеш. Тудо шке колыштшыжым муэш, шонем. Вучыза у мурым, шонымашдам ойлыза. А тидыжым мый у да чапле мурсаскам шочыкташ кугу шӱкалтыш да ак семын шотлаш тӱҥалам.

- Лудшына-влаклан ала иктаж-мом тыланет ыле?

- Чылалан кумылым нӧлтышӧ мурым да сай игечым тыланем.

- Тау, Виктор. Пашат ушныжо.

Николай ЛЮБИМОВ мутланен.

ШОНЫМАШДАМ КОДЫЗА:

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.