Марий Оньыжа Эдуард Александров марий калыкым У ий дене саламла

0
377

Шергакан марий калык! 

Марий Мер Каҥаш лӱм дене У 2018 ий да Шорыкйол пайрем-влак дене саламлем.
У ий у пиал да у сеҥымаш дене кылдалтеш. Йомак сынан пайрем мыланна у ӱшаным конда, вий-куатым ешара. Тудым эше еш пайрем манына. Чынжымак, ты йӱштӧ пагытыште еш, родо-тукым дене вашлияш, икте-весын вачыжым шижаш, чон кумылым вашла пӧлеклаш йӧн пуалтын. Меат, кумда тӱня мучко илыше марий калык, шкенам ик еш семын ужшаш улына, вет мемнам ик йылме, тӱвыра, йӱла ушат. Родо-тукым кылнам арален, вияҥден шогышаш улына.

Тек 2018 ийыште кажне кече тыланда мучашдыме чолгалыкым да пиалым конда, чондам ласка кумыл рӱпша да кажне волгыдо шонымашдам шуктен толеш. Ончыкыжымат марий калыкнан да Марий Элын волгыдо ончыкылыкшо верч пырля тыршаш ӱжам. Тек шочмо йылмына, марий тӱвырана да кугезе йӱлана калыкнан чоныштыжо сескемалт йӱлат да марий улмына дене кугешнаш таратат.

Кажне еҥлан у идалыкыште волгыдо корным, пеҥгыде тазалыкым, кужу ӱмырым, вашла пагалымашым да пиалым тыланем. Тек 2018 ий кажне ешыш улан да волгыдо илышым, чон ласкалыкым конда.

У ий дене! Шорыкйол дене!

Марий Оньыжа Э.Александров.

ШОНЫМАШДАМ КОДЫЗА:

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.