Лариса Яковлева марий калыкым Талешке кече дене саламлен

0
285

Пагалыме марий калык!

Кажне калыкын талешкыже уло, кӧ шочмо калыкшын мландыжым аралымаште вийжым чаманен огыл, калыкын илышыжым саемдымаште шке шинчымашыжым, моштымашыжым раш почын. 

Марий калыкна ожнысек Полтышым, Чумбылатым, Акпатырым, Чоткарым, Пашканым, Мамич-Бердейым шарнен ила. Огына мондо 19-20 курымласе марий калыкнан шке шамжым нӧлтал, марий сылнымутым да йылмым вияҥден колтымаште тыршыше калыкнан эргыже ден ӱдыржӧ-влакым. И. Петровым, В. Васильевым, С. Чавайным, Я. Эшпайым, И. Ключников-Палантайым, И. Галкиным, Л. Грузовым, А. Васильевым, Г. Посибеевым да шуко-шуко марий калык гыч лекше-влакым талешке радамыш пуртен кертына. Нуно тӱрлӧ сферыште тыршеныт, марий ял ден ола тӱзланышт, пасуна чапле шурным пуышт манын тыршеныт, йылмына да сылнымутна пеледышт манын тыршеныт.

Марий кугыжаныш пайрем семын Талешке кечым 1991 ий гыч палемдена. Ынде тиде пайрем тӱня мучко, манаш лиеш, палемдалтеш. Тидыже куандара да шке калыкна верч кугешнымашым луктеш.

Пагалыме марий-влак! Алал кумылын тендам Марий талешке кече дене саламлем. Икте-весе дене мӱкш семын келшен, эр чолпан гай нӧлталт илаш тыланем. Ончыкыжымат йылмынам йӧраташ, йӱланам саклаш йодам. Таза лийза, пиалдам да ешдам шинчасортала аралыза.

Российысе марий-влакын
Федерал калыкле-тӱвыра
автономийын вуйлатышыже Лариса Яковлева

ШОНЫМАШДАМ КОДЫЗА:

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.