Шернур районысо Марисола школышто 2-8 июльышто Россий кӱкшытан марий самырык тукымын черетан Х слётшо эртен.
Форумыш марий-влакын тӱшкан илыме Татарстан, Башкортостан республик, Свердловск, Киров область, Пермь кундем да Марий Элын чыла гаяк районжо гыч 100 наре самырык еҥ погынен.
Слётын участникше-влак куд кече жапыште лекцийлам колыштыныт, практик занятийлам, палыме еҥ-влак дене вашлиймашым, мастар-класс-влакым эртеныт. Слёт мучашлалтмек, ӱдыр-рвезе-влаклан сертификатым кучыктеныт.
Ушештарена, Россий кӱкшытан Марий самырык тукым слёт 2009 ий гыч эрта. Вес ийын слёт Морко районысо Унчо кундемыште эрташ тӱҥалеш.