«Унчоfest» лагерь-семинар кином йӧратыше-влакым чумырен

Лагерь-семинарыш 50 утла еҥ чумырген.

Морко районысо Унчо кундемыште 12-15 июльышто «УнчоFest» лагерь-семинар эртен. Участник-влак кином войзаш тунемыт. 

Туныктыш форумыш Марий Эл, Татарстан, Ханты-Мансийск автономном округ, Моско, Санкт-Петербург, Эстоний ден Венгрий гыч 50 утла участник погынен.

Семинар жапыште тӱрлӧ мастер-класс, фильмым войзышо эксперт-влак дене вашлиймаш, тренинг, лекций-влак эртеныт.

Участник-влакым кондымо пашаштым жюри член-влак тӱрлӧ номинацийыште акленыт. Тыге, конкурсын Гран-прижым Иван Герасимов «Мужыр корно» фильмжылан налын. «Эн сай режиссёр паша» номинацийыште Вера Акпатырева («Могай тыныс тиде тӱня») сеҥен. «Эн сай сценарий» номинацийыште Эльвира Евгеньева палемдалтын. Тудо марий актёр Йыван Кырлан илышыже да усталык корныжо нерген «Мустафа» фильмым ямдылен. «Эн сай муро клип» номинацийыште Роберт Семенов («Муканай ял пайрем») сеҥен. «Эн сай оператор паша» номинацийыште Алексей Ивановын пашаже («Палыш») палемдалтын.

Ушештарена, «Унчоfest» лагерь-семинар кокымшо гана эртен. Икымше гана лагерь-семинар 2016 ийыште 30 наре журналистым, оператор ден кином йӧратыше-влакым чумырен.

Кидшер
Шонымашым ешараш