Россий Федераций правительстве председательын алмаштышыже Виталий Мутко Марий Эл Республикым ыштымылан 100 ий теммым палемдаш ямдылалтме да эртарыме шотышто оргкомитетым вуйлаташ тӱҥалын, палдара Марий Эл Республик вуйлатышын организаций-аналитике виктемже.
Тидын нерген кӱштымашым Россий премьер-министр Дмитрий Медведев подписатлен.
Документ дене келшышын, комитетыш РФ финанс министрын икымше алмаштышыже Леонид Горнин, тазалык аралтыш министрын икымше алмаштышыже Татьяна Яковлева, тӱвыра министрын алмаштышыже Ольга Ярилова, Цифровой вияҥмаш, кыл да тӱшка коммуникаций министерствын тӱшка увер средства-влак областьыште Кугыжаныш политике департаментшын директоржо Екатерина Ларина, тыгак Федераций Советын да Федеральный Собранийын Кугыжаныш Думыжын еҥже-влак, исполнительный кучемын федеральный органже, Российысе банк, Всероссийский кугыжаныш телевизионный да радиовещательный компаний-влакын еҥышт пурталтыныт.
Ушештарена, Марий Эл Республикым ыштымылан 100 ий теммым палемдыме нерген указым Россий Президент Владимир Путин 2013 ий 9 февральыште подписатлен. Юбилей 2020 ийыште торжественно палемдалташ тӱҥалеш.
Россий Федераций правительствын кӱштымашыже-влак дене тиде пайремлан ямдылалтме да эртарыме тӱҥ мероприятий-влак план пеҥгыдемдалтын. Тыгак федеральный бюджет гыч софинансированийын эн кугу кугытшо палемдалтын. Тиде окса тӱшка тӱвыра мероприятий, выставке, фестиваль-влакым эртараш, увер сынан да савыктыме пашам шукташ, тӱвыра поянлык объект-влакым уэмден тӧрлаташ кучылталташ тӱҥалеш.
Л. Камалетдинова
«Марий Эл» газет.