Яжон тыменьшӹвлӓлӓн У и айо

0
264

Кырык мары районыштына тыменьмӓштӹ кӱкшӹ пӓлӹмӓшӹм анжыктышывлӓн тене пӹтӓриш гӓнӓ У и айо эртӓрӓлтӹн.
28-шы декабрьын Пайскырык культура томашты кырык мары районыштыш школвлӓ гӹцӹн шукы ӹдӹр-ӹрвезӹвлӓ погыненыт. Культура отделын, Макарсир культура томан, Яштуга клубын, Пайскырык культура томан дӓ библиотекын творческий коллективвлӓн шытыр доно ти айо кечӹ пишок сӹлӹнӹ лин.
Сценышты «Шӹдӓн У и» сценарии семӹнь (авторжы Макарсир культура томан вуйлатышы Ирина Юшкина) масакла ямак получаялтын. Ӱштӹ Кугуза, Лым Ӹдӹр, Яга Папивлӓ, Увер Кыва дӓ ямак гӹц вес хынавлӓӓт сценышты масакланенӹт. Тетявлӓ нӹнӹм сусун вӓшлинӹт дӓ ӹшке мастарлыкыштымат анжыктенӹт. Айошкы Пайскырык, Виловат, Микрӓк, Эмӓн, Троицкий Посад, Кӓтӓ Шошмар, Пистерлӓ школвлӓ гӹц тыменьшӹвлӓ У им вӓшлиӓш толыныт.
Кырык мары район администрацим вуйлатышын социальный пӓшӓвлӓ доно палшышы Е.В.Смелов, Кырык мары муниципальный районын Образовании отделым вуйлатышы Н.Н.Тораев тетявлӓм пуры шамаквлӓ доно кымылангденӹт.
Тенгеок Лым Ӹдӹр (Ирина Юшкина тӹдӹм мадын) цилӓ тыменьшӹвлӓлӓн цӱдӓ пумагавлӓм кычыктен. Варажы Кого Кож йӹр цилӓнӓт иквареш ушнен, тетявлӓ мыренӹт, куштенӹт, лыдышвлӓм лыдыныт. Тымдышывлӓ, ӓтя-ӓвӓвлӓ сусун икшӹвӹвлӓштӹм тӹшленӹт, сагашты, ӹвӹртен, У им вӓшлимӹ кымылым нӓлӹнӹт. Шанена, техень Кож айо Кырык мары районышты ӹнде и гӹц иш эртӓрӓлтӓш тӹнгӓлеш. Техень согоньым ӱжмӹ хынавлӓӓт келесевӹ.

«Акпарс» радиостудий

Если вы нашли ошибку, пожалуйста, выделите фрагмент текста и нажмите Ctrl+Enter.

ОСТАВЬТЕ ОТВЕТ

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.