Йыл сирӹн кого мырызыжы – Николай Егоров

0
200

foto-kashutina25 ноябрьын поэт-мырызы, журналист, Россий Федерацин дä Мары Эл Республикын культурын заслуженный пäшäзӹжӹ, Олык Ипай лӹмäн государственный премин лауреатшы Н.П. Егоровлан 80 и темӹн. Салымсолаштышы Н. Игнатьев лӹман музейӹштӓт ти кечӹм пӓлемдӹде ордӹжеш кодыделна. 
1 декабрьын Эмӓнсолан школын 5 дӓ 9 б классышты тыменьшӹвлӓ, кӓршӹм шактышывлӓн «Нӹжгӓ сем» ансамбль (вуйлатышы Л.И. Салянова), гармонист Арсений Яйцов, поэтесса М.А. Илдушкина, культура отделын видышы специалист Н. Яшмолкина, мырызы Зоя Смирнова дӓ Салымсолашты ӹлӹшӹвлӓ, шотеш пиштен миэнӹт.
Николай Петрович Егоровым ӓшӹндӓрӹдежӓт ак ли. Вет тӹдӹ музейым пачмаш шукы вижӹм пиштен, йӓмдӹлӓлтмӓшӹн оргкомитетӹштӹ ик тӹнг вӓрӹм йӓшнен, палшыкым пуэн шалген. Музейын фондышкат шукы материалым, книгӓвлӓм, фотографивлӓм подарен. Сакой вӓшлимӓшвлӓш, поэт-писательвлӓн ӓшӹндӓрӹмӓш вадывлӓш сусунок толын. Тӹдӹн юкшым, попымыжым, лыдышвлажӹм лыдмыжым, нигынамат колышт нерад ат ли. Мӹньӹ ӹшкеӓт когоэшнен кердӓм, техень лӹмлӹ поэт доно ик стӧл лошты хытырен шӹнзӓш цӓш лин.
А мӓмнӓн ӓшӹндӓрӹмӓш вадынам Эмансола школын «Нӹжгӓ сем» кӓрш шактышы ӹдӹрвлӓн ансамбль Николай Егоровын «Йӓнгем йыла» лыдышеш Владислав Куприяновын сирӹмӹ сем доно тӹнгӓлевӹ.
Мастар поэтӹн ӹлӹмӓш да творческий корныжын цилӓ монгыржым музейӹн сотрудникшы С.Ильина раскыдын пачын пуш.
«Юнга-фильм» киностудин вуйлатышы Анатолий Дмитриевич Амельченкон «Рождение песни» киножым цилӓн юк лыкде анжевы. Вет тӹштӹ Николай Петровичӹн шачмы Шурмар солажы анжыкталтеш, кыце мырывлажӹ шачыт, йӓнг вашт шайыштеш. Тенгеок Эмӓнсола школын 5 классышты тыменьшӹ Алина Саматаева мастарын, артистланен «Куку дон ӓптан» басньым шайышт пуш.
Ик концертат Николай Егоровын лыдышеш сирӹмӹ мыры гӹцӹн пасна ак эртӹ. Шукы лыдышыжы халыкын яратымы мырыш сӓрнӓлтӹнӹт. Ти гӓнӓкӓт «Ӱж тӹнь мӹньӹмӓт», «Сары тӹлзӹ» мырывлӹм Зоя Смирнова йонгалтарыш. Иквӓреш «Пеледӹш» ансамбльышты пӓшӓлӹмӹ жепшӹм Арсений Яйцоват шокшын ӓшӹндӓрӹш, мырымат мыралтыш. А «Кырык сирем, шачмы вӓрем» мырым, кыдылан семӹм композитор Александр Соснов сирен, Арсений Яйцовын гармонь доно шактымыжы сага цилӓн иквӓреш мыралтышна.
Пуры шаявлӓм Николай Петрович Егоров гишӓн Мария Алексеевна Илдушкина келесӹш. Цӓрӓ ялан жепӹштӹм ӓшӹндӓрӓльӹ дӓ сӓмӹрӹквлӓлӓн туан шачмы йӹлмӹнӓм яраташ, шотеш пиштӓш, шукырак лыдаш согоньлыш.
Надежда Яшмолкина музейӹн пӓшӓзӹвлӓлӓн техень пуры вӓшлимӓшӹм организуйымы дӓ эртӓрӹмӹ гишӓн, Николай Егоровын «Акпарс» радиостудим пачмашкы, пӓшӓлӹмӓшкӹ вим пиштӹмӹжӹлӓн, радиостудин кӹзӹтӓт йонгалтмыжылан таум ӹштӹш.
Мастар поэт Н.Егоровын творчествыжы кырык мары халыкнам лӹмлештäрен, йӹлмӹнäм виäнгден, культурынам лÿктен. Цилä тидӹм шотыш нäлӹн, 2014 ин 17 сентябрьын Кырык Мары районын депутатвлäн Собрани V созывын церотдымы сессиштӹжӹ Пайскырык Культура томалан Н.П.Егоровын лӹмжӹм пумы гишäн решеним пингӹдемден. Тӹнäмшен Пайскырык Культура тома поэт Н.Егоров лӹмым намалеш.
Пакылажы цила толшывлӓм экспозиционный залыш ужӹннӓ. Тиштӹ Н.П. Егоров лӹмеш «Йыл сирӹн кого мырызыжы» кого выставкым йӓмдӹленнӓ. Музейын фондышты перегӓлтшӹ рукописьвлӓжӹм, лыдыш книгӓвлӓм, семняжӹн фотовлӓм ти выставкышты ужаш, келгӹрӓкӹн тӹдӹн доно пален нӓлӓш лиэш.
Вӓшлимӓшнӓ пиш пурын, тырын эртӹш, яжо ӓшӹндӓрӹмӓшӹм кодыш. Мӓ докына толшывлӓлӓн цилӓлӓн таум келесенӓ. Тӓӓт, лыдшы тӓнгвлӓ, поэтӹн творчествыжым лыдда, мырывлäжӹм мыраш кымылда лижӹ!

Елена Кашутина
Н. Игнатьев лӹмӓн музей

Если вы нашли ошибку, пожалуйста, выделите фрагмент текста и нажмите Ctrl+Enter.

ОСТАВЬТЕ ОТВЕТ

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.