Марий Эл деч сенатор Константин Косачёв финн-угор тӱнян тенийсе тӱвыра рӱдыверже — Унчо селаш икымше гана миен.
Эн ончыч политик кидпаша мастарлык пӧртым онченыт, «Порсын кумыл» марий тӱр студий дене палыме лийын. Вара тошто марий илем тоштер-этнографий комплексыш пурен. Палыме лийме эше ик вер-тиде усталык мастерской. Тушкак «Акреттӱр» тошто марий тӱрым тӱрлышӧ студий, воштыр гыч тодмо студий, марий кочкышым тамлен ончымо пӧлем пурат.
Сенатор 18 метр кӱкшытан мардеж вакшат ӧрдыжеш кодын огыл. Тидын годымак Унчо тӱвыра пӧртыш, школыш пурен лектын. Кызыт тудын кокымшо корпусшым окса укелан кӧра чоҥен пытарыме огыл.