Республикысе калык арвер да сымыктыш тоштерыште уста кид-мастар Лидия Веткинан «Кайыккомбо кашта» лӱман ончерже 25-ше июньышто почылтеш. Тудо республикынан 100 ияш лӱмгечыжлан пӧлеклалтеш.
Лидия Веткина – Шернур районын шочшыжо. Шке марий тӱржӧ дене тудо республикынам Россий кӱкшытыштӧ веле огыл чапландара, йот эллаштат лӱмжӧ палыме. 2016-шо ийыште, мутлан, Индийышке миен коштын. Тушко Бразилий, Россий, Индий, Китай да Южный Америка гыч кид-мастар-влак погыненыт, икте-весышт дене опыт дене пайлалтыныт.
Ончырыште Шернур марий-влакын тошто да кызытсе вургем коллекцийыштым ужаш лиеш. Лидия Васильевнан пашаже-влак моткоч ойыртамалтше улыт. Тудо тошто тӱрлымӧ йӧным кучылтеш. Тыге тудо марий калыкын тӱвыра поянлыкшым арален кодаш полша.