Кечым иктешлен: сӱрем тылзын 1-ше кечысе тӱҥ увер-влак

Сӱрем тылзын 1-ше кечысе тӱҥ увер-влак.

Марий Эл Республикым вуйлатыше Александр Евстифеевын Указше дене туныктымо пашаште кугу сеҥымашыш шумылан да самырык тукымым шуарыме да туныктымо пашашке пыштыме надырлан Йошкар-Оласе «Лира» сымыктыш школын директоржо Ангелина Речкинам «Марий Эл ончылно надырлан» орденын медальже ден палемдыме. Указым правительствын сайтыштыже вераҥдыме.

МВД пеленысе Общественный советше сад-пакчалаште шолыштмашым шижтарыме мероприятий-влакым эртара. Тидын годым видеоэскерыме системым шыҥдараш кӱлмӧ нерген ушештара. Кеҥеж паша тургымышто осал пашам, велоспедым шолыштмым, сад-пакча пӧртла гыч шолыштмашым ончылгоч шижтарыме йодышым Общественный Советын пытартыш заседанийыштыжат нӧлталме ыле. Тушто икмыняр темлымашым ыштеныт. Нунын кокла гыч иктыже — сад товариществын еҥышт да председательышт дене профилактике пашам эртарымаш. Каныш кечылаште Медведво районысо икмыняр сад-пакчаш миен коштыныт. Лач тушто шуко шолыштмаш лиеда. Вуйлатыше- влак дене ятыр йодышым каҥашеныт. Туҥ йодышыжо видео камерым вераҥдыме нерген лийын, поснак сад кундемыш пурымаште. Окнам, омсам пеҥгыдемдаш кӱлмӧ, ӱшанле сурам пижыктыме, пӧрт ден сарайлаште шергакан ӱзгарым кодаш огыл манын ойлымо.

Моско кундемыште мини-футбол дене начар ужшо- влак Российын чемпионатыштыже таҥасеныт. Тушто куд команде модын. Марий Элысе футболист-влак Татарстанын командыжым 6 да 0, Угарманын командыжым 6 да 1, Дагестаным 3 да 0, Москон футболистыштым 2 да 0 счёт дене сеҥеныт. А Моско областьын командыже Марий Элын капкашкыже ик мечым пуртен кертын. Тыге Моско область сеҥышыш лектын, а мемнан-влак ший призёр лийыныт.

Аркадий Сергеев

Кидшер
Шонымашым ешараш