Кугыжаныш Дума Российысе калык-влакын шочмо йылмыштым туныктышо-влаклан полышым пуымшо шотышто йодыш дене пашам ышта. Кугыжаныш Думышто калык-влакын пашашт шотышто комитетым вуйлатыше Ильдар Гильмутдиновын мутшо почеш, шочмо йылмым туныктымо концепцийым ыштыме. Тудын ик эн кӱлешан пунктшылан шочмо йылмым туныктымо да тиде йылме дене туныктымо йодыш дене материалын электрон банкшым ыштымаш шотлалтеш. Вес кӱлешан пунктшо туныктымо-методик, материально-технический да кадр ресурсым ситарымашым терген шогымаш дене кылдалтын. Тыгак калыкле регион-влаклан кок квалификациян туныктышо-влакын кӱлешлыкыштым рашемдаш кӱлеш: руш да шочмо йылмым  але руш да шочмо литературым туныктышо-влак. Концепций шочмо йылмым туныктымо тӱҥ проблеме-влакым виктарен колтышаш.

Марий Элын Вуйлатышыже Александр Евстифеевын 22 июльышто пенгдымдыме кӱшткышӧ дене Александр Сальниковым Марий Эл Республикын Правительство председательжын икымше алмаштышыжлан шогалтыме. Ончыч тудо тиде должностьышто жаплан шуктышо семын лийын. Вес кӱштыкшӧ дене Михаил Леонтьевым, шке кумылын йодмыжо почеш, Марий Эл Республикын чоҥымаш, архитектуро, илымвер да коммунал озанлык министрын должность деч утарыме. Ынде тачысе кече гыч министрын сомылжым тудын икымше алмаштышыже Евгений Соколов жаплан шукташ тӱҥалеш.

Москошто «Русское поле» маналтше славян сымыктыш фестивальыште Марий Эл деч делегаций лийын. Тиде усталык пайрем Российыште Театрын Идалыкшылан пӧлеклалтын. Фестиваль Коломенский тоштер-заповедник кумдыкышто лу тӱрлӧ тематике площадкыште гужлен. Калык кидпаша узгар-влак, турло калык-влакын шке шотан сылне вургемышт да сӧрал калыкле пӧлек-влак. Чыла тиде поянлыкым кугу элнан 59 кундемже гыч толшо делегаций-влак ончыктеныт. Нунын коклаште мемнан республикына гычат кидмастар-влакат. Фестивальын унаже-влак марий кӱслем ыштыше мастар дене палыме лийыныт, кызытсе вургемыште марий тӱрым мастарын кучылтмым ончен акленыт. Усталык коллектив коклаште фестивальыште шке мастарлыкыштым «Ныжыл сем» фольклор ансамбльын участникше-влак ончыктеныт. Пӱтынь Российысе да Тӱнямбалсе конкурс-влакын лауреатше конкурс программыште «Эн сай куштышо коллектив» номинацийыште кокымшо степенян дипломым сеҥен налын. Фестивальыште мемнан ансамбльын участникше-влак сводный руш хорышто муралтеныт.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.