Моско ден Йошкар-Ола коклаште шукертсек вучымо южкапка почылтын. Эрдене Марий Элын аэропортшо гыч самолёт южыш чоҥештен кӱзен. Тиде событий дене республикысе калыкым Марий Элым вуйлатыше Александр Евстифеев саламлен. Тудо икымше рейсын пассажирже лийын. Кучемын планыштыже кечывалвел да йӱдвел могырышкылат юж корным почаш шонымаш уло. Тиде — Сочи, Крым да Санкт-Петербург. Калыкым «Руслайн» авиакомпаний шупшыкташ тӱҥалын. Таче чылаже Москош 31 пассажир чоҥештен. Нуно Внуково аэропортыш сайын волен шинчыныт.
Федераций Советын председательже Валентина Матвиенко Марий Элысе калыкым юж корно почылтмо дене саламлен. Кужу каныш деч вара икымше рейсын чоҥештымыже нерген Федераций Советын пленарный заседанийыштыже Марий Эл деч сенатор Константин Косачёват каласкален.
Рудолаштына, Сомбатхей микрорайонышто Тазалык аллей кумдыкышто рудолаште илыше-влаклан эше ик у спорт площадкым, канатный верым почыныт. Тыште велосипед дене кудалышташ лӱмын посна верым ыштыме, канашлан теҥгыл-влакым верандыме, кас жапыштат кошташ моткоч каныле, парк кумдыкышто понар-влакым шогалтыме. Йоча да тыгак спортым йӧратыше-влаклан тыште шке тазалыкым шуараш лӱмын спорт площадке уло.