Шернур районысо эмлыме вер медоборудованийым уэмдаш 22 миллионат 800 тӱжем теҥге оксам налеш. Тыге тений Шернур эмлыме верын специалистше-влак цифран флюорограф да цифран рентген маммограф аппаратан кусныл коштшо медицина комплексын полшымыж дене черым пален налме пашам саемден колтат.
Медицина тӧнеж тыгак ик мобильный медицина комплексым налаш шона. Тудыжо медосмотрым да диспансер эскерымашым шукырак ышташ йӧным пуа. Тыгак сосудистый пӧлкаште у оборудований лийшаш. Тений УЗИ сканерым налыт, 2021-ше ийыште компьютер томограф, 23-шо ийыште ныл ИВЛ да моло аппарат толшаш.
Эмлыме верын уверже почеш, 2021-ше ийыште тушто рак черым писын пален налаш Район-влак кокласе амбулаторный онкологий полыш рӱдерым почаш палемдыме. Вашталтыш-влак йоча поликлиникымат вучат. Тудым олмыкташ кок миллион теҥге оксам ойырымо.
Аркадий Сергеев