Кечым иктешлен: сӱрем тылзын 25-ше кечысе тӱҥ увер-влак

Сӱрем тылзын 25-ше кечысе тӱҥ увер-влак.

Сӱрем тылзын 25-ше кечысе тӱҥ увер-влак нерген «Кидшер» интернет-журнал палдара.

Профессионал пайремыштым палемденыт

Россий Федерацийын следствийын пашаеҥже-влак 25 июльышто профессионал пайремыштым палемденыт. Тиде кечым 2013 ийыште пеҥгыдемденыт. Арам огыл тиде кечым ойыралтын. 1713 ийыште Пётр I «Следствий канцелярийым негызлыме нерген» кӱштыкым пеҥгыдемден. Следствий Комитетын Марий Элыште Следствий Виктемжын сотрудникше-влак пайрем погынымашыш чумыргеныт. Республикысе органын вуйлатышыже Александр Мигушов пашаште кугу кӱкшытыш шушо, неле задачым шуктышо Виктемын личный составшым саламлен. Тидын годымак СМИ пашаеҥ-влак коклаште эртаралтше конкурсым иктешленыт. Палемден кодыман, тачысе кечылан Марий Элыште Следствий Виктемыште 95 сотрудник. Тышке кок оласе пӧлка пура. Тидын годымак, республикыштына 7 территориальный подразделений да район кокласе вич следствий пӧлка пашам ыштат.

Пу оралте-влакым кораҥдат

Йошкар-Олаште озадыме леваш-влакым пужен кораҥдыме паша шукталтеш. Тиде арняште тошто пу оралте-влакым Ширяйково микрорайонысо Клара Цеткин уремыште пуженыт. Тыгак Складской, 13 адрес дене да Советский уремысе, 84 пӧртын кудвечыштыже. Тоштемше да озадыме леваш-влакым рашемдыме шотышто пашам оласе администраций шукта. Оласе пого шотышто комитет пашаеҥ-влакын ойлымышт почеш, кызытсе илышыште тыгай оралте-влакын кӱлешлыкышт уке. Тошто леваш-влак кудвечылам тӱзатымаште йӧндымылыкым луктыт. Адакшым нуно пожар шотышто лӱдыкшым ыштат. Тыгак тыгай верлаште сай огыл комапний-влак погынат. А тидыже калыкым тургыжландара. Мэррийын увертарымыже почеш, кеҥеж жапыште озадыме леваш-влакым шым кудвечыште пужен кораҥдат. Тиде пашам шукташ оксам оласе казна гыч ойырат.

Ял шотан илемыште контейнер площадке-влакым верҥдат

Кокшайск ял шотан илем администраций кумдыкышто илыше-влак ласкан илаш тӱҥалыныт. Ондак нуно шукшак да пеҥгыде коммунал торым поген наҥгайыме шотышто йӧндымылыкым шижыныт. Ынде ял шотан илем кумдыкышто улшо яллаште лӱмын посна контейнер площадке-влакым ыштыме. Кызытеш чылаже кудло утла тыгай верым йӧнештареныт. Пеҥгыде тор да быт шукшакым кораҥдыме шотышто коммунал полышым регионысо оператор «Благоустрйство» ушем шукта. Тудын пашаеҥже-влак шӱкшакым погымо, шупшыктымо, ойыркалыме да саклыме пашам ыштат. Верысе администрацийын пашеҥже-влакын ӱшандарен ойлымышт почеш, шӱкшакым шупшуктышо технике селашке да воктенсе яллашке кажне кечын толеш.

Кидшер
Шонымашым ешараш