Кечым иктешлен: сӱрем тылзын 31-ше кечысе тӱҥ увер-влак

Сӱрем тылзын 31-ше кечысе тӱҥ увер-влак.

Сӱрем тылзын 31-ше кечысе тӱҥ увер-влак нерген «Кидшер» интернет-журнал палдара.

Сай качестван корно

«Лӱдыкшыдымӧ да сай качестван автомобиль корно- влак» калыкле проект дене келшышын корным олмыктымо паша умбакыже шуйна. Кызыт Йошкар_Олан ик эн тӱҥ уремыштыже — Карл Маркс уремыште паша шукталтеш. Тиде урем дене пеш шуко машина коштеш. Молан манаш гын, тудо кок меҥгат 500 метр кужытышто олан промышленный ужашыж дене микрорайон-влакым ушен шога. Сандене тушто грузым, пассажирым шупшыктышо да троллейбус транспорт коштеш. Тиде урем гычак «Вятка» федерал автотрассыш лектыт. Пашам Новочебоксарск оласе предприятий шукта. Тымарте нуно Строитель урем деч кӱртно корно марте ужашым ыштеныт. Кызыт Панфилов урем ден Ленин проспект марте ужашыште асфальтын ӱмбал ужашыжым пӱчкын налыт. Канализаций люк-влакым «Водоканал» МУП вашталта. «Город» МУП йӱр вӱд йоген пурымо вер-влакым тӧрла.

У светофор-влак

Вашке Йошкар-Оласе калык тыглай лампочко дене пашам ыштыше светофор-влакым шарналташ гына тӱналеш. Нуным светодиодан аппарат дене вашталтат. Тиде арнян лампан кум светофорым вашталтыме. Тыгай тоштыжо ынде икте гына кодын. У объект-влакым Комсомольский ден Пролетар урем ушнымаште, Ломоносов ден Карл Маркс урем вожышто да ММЗ-ш пурымо тӱҥ верыште вераҥдыме. Тыгак Карл Маркс-Соловьёв- Гончаров урем-влак ушнымаште уым шогалтыме. Светодиодан светофор- влак кеч-могай игечыштат сайын койыт, энергийым щагалрак кучылтыт, лампым шуэш вашталтыман. Чыла тидыже утларак йӧнан манын палемдат специалист-влак.

Бюджетыш латик миллион теҥге

Йӱшӧ вуя руль воктеке шичше водитель-влак республикын бюджетшым 11 миллион теҥгелан пойдареныт. Суд пристав-влак икымше пелийын лектышыжым иктешленыт. Рашемын: тиде жапыште йӱшӧ вуя машинам виктарымылан кучалтше автомобилист-влаклан 11 миллион теҥге наре штрафым тӱлыктеныт. Южо парыман-влакын пашадарышт гыч але моло парыш гыч оксам кучен кодат, икмынярыжын погыжым арестоватлыме. Но йӱшӧвуя корныш лекше- влак штрафым чыланат тӱлышаш улыт.

Аркадий Сергеев

Кидшер
Шонымашым ешараш