(Йошкар-Ола, 1 август, «Кидшер»). Сорла тылзын 1-ше кечысе тӱҥ увер-влак нерген «Кидшер» интернет-журнал палдара.

740 йочалан у вер

Марий Элым вуйлатыше Александр Евстифеев ден Йошкар-Олан мэрже Евгений Маслов Правительстве пӧртыштӧ пашаче вашлиймаште рӱдолаштына социал кӱлешан оралте-влакым чоҥымо йодышым каҥашеныт. Тидын годым Александр Евстифеев кызыт чоҥалтше туныктымо тӧнежлаште паша кузе кайымым рашемден. Мэр увертарен: калыкле проект-влакын икымше лектышыжым оласе калык аклен кертеш. Индешымше микрорайонышто 825 йочалан келыштарыме школ чоҥалтеш. Тудым вес ийын ыштен шуктышаш улыт. Йӱштӧ толмеш школ деке коммуникацийым ыштен шуктыман. Вара отделке пашам тӱналман. Коммуникаций сентябр марте лийын шушаш. Масловын мутшо почеш 1-ше сентябрьлан «Восточный» микрорайонышто 320 йочалан йоча садым сдатлаш палемдыме. Октябрь мучаш марте Карл Либкнехт уремыште садик деке ешарен чоҥымылан кӧра эше 100 вер ешаралтеш. Икымше декабрьлан «Интеграл» микрорайонышто тыгак 320 йочалан садик почылтшаш. Иктешлаш гын, тений 740 вер ешаралтшаш. Мэрын мутшо почеш, кызыт эше кок йоча тӧнежым чоҥаш тӱҥалаш ямдылалтмаш кая — «Мирный» микрорайонышто да Гагарин проспектыште. Республикым вуйлатыше тыгак Ната Бабушкина лӱмеш сквер нерген йодын. Евгений Маслов тушто пашам мучашлыме, калык уло кумылын каналташ лектеш, манын увертарен. Кызыт тыгак тротуар- влакым олмыктымо паша кая.

У ончер

Йошкар-Олаште Благовещений тӱвыра-ончер рӱдерыште «Оласе урем-влакын геометрийже» ончер почылтын. Тудо марий рӱдӧлан 435 идалыкшылан пӧлеклалтын. Ончерыште Тимофей Евсеев лӱмеш калыкле тоштерын фондшо гыч фотосӱрет-влакым, Юл кундемысе кугыжаныш технологий университетын студент-влакын диплом-пашашт да макет-влакым кучылто. Ончышо-влаклан ожнысо тӱрлӧ урем, микрорайон, илым пӧрт да полат ден тӧнеж-влак, предприятий-влакын пашаштымат ончыктымо. Рӱдӧланан ий гыч ийыш кузе вашталтмыжым, тудын чоналтмыжым фотосӱрет гоч ужаш толшо-влаклан моткоч оҥай лиеш.

Ешлан окса полыш

Марий Элыште тенийын икымше пелыштыже ава капиталым 695 миллион 500 теҥгем кучылтмо. Шукыж годым тиде окса полыш дене займ але кредитым петыраш, тыгак пачерым чоҥымо, налмылан кучылтыт. Тыгай йӧн дене пел ий жапыште 1 200 утла еш пайдаланен. А 400 утла еш, ава капиталым кредитым кучылмо деч посна, илымыверым саемдаш кучылтын. Тыгодымак, шагал огыл еш окса сертификатым икшыве-влакын тунеммыштлан колта. А теве кок ешыште оксам аван пенсийжым чумыраш манын кутырен келшеныт. Тыгак кумылан еш-влак, ава капитал гыч, кажне тылзын окса полыш семын 9 545 теҥгем налын кертыт. Тиде йӧн дене республикыштына 249 еш пайдалана. Россий пенсий фондын Марий Элыште виктемжын пӧлкалаштыже палемдат, тыгай полышым тӱлаш, тений гына куд тылзыште бюджет гыч 20 миллион теҥгем ойыреныт.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.