(Йошкар-Ола, 2 август, «Кидшер»). Сорла тылзын 2-шо кечысе тӱҥ увер-влак нерген «Кидшер» интернет-журнал палдара.

Спортым вияҥдаш

Республикысе самырык политке, спорт да туризм министерстве физкультура ден спортым вияҥдаш Марий Эл правительствын грантшым налаш тенийсе конкурсышто сеҥыше-влакын спискыштым савыктен. Тушко 18 организаций пурен. Правительствын пеҥгыдемдымекыже, нунын коклаште ик миллионат 400 тӱжем теҥге грант окса шеледалтеш. Тушечын 700 тӱжемже «Тӱшка спорт» корно дене, молыжо «Эн кугу кӱкштыш шумо спорт» корно дене ойыралтеш. Тӱшка спортым вияҥдаш 50 тӱжем теҥге дене 11 организаций оксам налеш. 100 тӱжем теҥге дене  4 спорт клуб да спорт федераций палемдалтыт. Кок корныжымат вияҥдаш 150 тӱжем теҥге гыч иймаш дене олимпий резерв спорт школ, фитнес-аэробике федераций да сокыр-влак ушемын республикысе тӧнежышт налыт.

Сайлымаш — 2019

8 сентябрьыште Марий Элыште йӱклымаш кече эртаралтеш. Тиде кечын Кугыжаныш Погыныш, оласе, районласе да верысе депутат-влак погынымашыш депутат-влакым сайлаш тӱҥалыт. Таче кандидат-влакым регистрацийым эртарыме тапыр мучашлалтын. Тидын шотышто Республикысе Рӱдӧ сайлыме комиссийын председательже Ирина Татаринова журналист-влаклан брифингым эртарен. Тудын мутшо почеш, шушаш сайлымаште куд политике партий шке кандидатыштым луктын. Единый Россий, КПРФ, ЛДПР, Справедливый Россий, Пенсионер-влакын социал чынлык верч партий, Россий Коммунист-влакын партийышт. Чылаже республике спискыш 228 кандидатын лӱмыштым пуртымо. Тыгаяк регистрацийым ик мандатан округла гыч кандидат-влак эртат. Нунын лӱмыштым Рӱдӧ сайлыме комиссийын ГАС «Выборы» сайтыштыже пален налаш лиеш.

У тунемме ийлан

Республикысе школ-влакын 60% пожар лӱдыкшыдымылык шотышто тергымашым эртен. Шарныктена, мемнан 250 утла тӱнтуныктыш тӧнеж уло. Нунын кокла гыч 175 тергымашым эртеныт. Инспектор-влак поснак тӱткышым уремыш писын лекташ келыштарыме вер-влаклан ойырат. Пожарный сигнализацийым тергат, тулым йӧрташ ӱзгар-влакым ончат. Тыгак школысо пашаеҥ-влакын вучыдымо туткарлан ямде улмыштымат умылкалат. Волжск да Козьмодемьянск оласе, тыгак Советский, Шернур, Оршанке, Параньга да Марий Турек районласе чыла школ тергымашым эртен. Ончен лекме 19 школыштыжо изирак ситыдымаш-влакым палемдыме. Нуным лишыл жапыште кораҥдышаш улыт.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.