(Козьмодемьянск, 6 август, «Кидшер», Дмитрий Исламов). Козьмодемьянск олан администрацийже ваштареш верланыше корнысо участке сентябрь тылзе пытымешке петырыме лиеш. Кызыт тыште чоҥымо пашам тӱҥалме.
Тӱрлӧ транспортлан кудалышташ келыштарыме оласе корнын оҥган ужашыжым угыч ыштат. Тошто дене таҥастараш гын, тудо утларак лӱдыкшыдымӧ лийшаш. Тыште пашам ышташ кӱлмӧ нерген эше 5 ий ончычак шонаш тӱҥалыныт. Лӱмын тидлан проектым возеныт.
Ик тылзат пеле наре жапыште олан тиде ужашыже чылт у да сылне тӱсым налеш. Чыла пашам шукташ шийвундым оласе да республикысе бюджетла гыч ойырымо.