Ужар чия ден чиялтем кӱварым,
Шемалге тӱс деч темын шер йӧршеш.

Светлана Эсаулован тиде почеламут корнылажым арамлан огыл уш дене шарнен кодынам. Вет тудо койышыж денат, шонкалымашыж денат моло деч ойыртемалтше ыле. Тыге ыштем, ойлем да еҥже мом манеш манме йодыш дене вуйжым аҥыртылын огыл. Кӱварым чиялтем манмаште … Ваш коштмо ик лишыл ӱдырамашыже ойлен ыле: «Светлана пачержым моткоч чӱчкыдын олмыкта. Ик гана миет – ик тӱрлӧ интерьер, икмыняр жап гыч пурет – весышке логалат».
Светланан эн ончычак уста поэт, вес могырымжо, чынжымак, ойыртемалтше улмыж нерген шукерте огыл Марий национальный библиотекын краеведений пӧлкашкыже чумыргышо-влакат ойленыт. Тушто поэт да журналист, ученый да вуйлатыше, студент да моло еҥ-влаклан погынаш амал теве могай лийын: шукерте огыл Марий книга савыктыш Светлана Эсаулован «Шинчашкет ом ончо сулыканла» почеламут сборникшым савыктен луктын. Книгам вес ӱдырамаш поэт – Валентина Изилянова – чумырен, савыкташ ямдылен. «Книга деч посна поэт нерген шарнымаш кужун огеш иле, — манеш тудо. – А Светланан кажне почеламутшо — шедевр, тушто философий, чон уло». Тидын дене келшыде огеш лий. Илымыж годым савыктыме шот дене тудым утыжым куандарен огытыл гынат (тыгак тудын нимогай аклыме кагазшат лийын огыл), Светлана Эсаулова палыме да жаплыме поэт лийын да лийын кодеш.
– А мый тудым утларакше айдеме семын кӱкшын аклем,- ойла вес поэт Герман Пирогов. – Мутланыме годым тудо шкенжын илыш туштыжым рашемден кертдымыж нерген ойла ыле. «Пӱртӱс мылам нимомат чаманен огыл. А молан Юмо мыйым самырыкнек тынар «кыраш тӱҥале?» — манын.
Тӱҥжӧ – тудын кумдан шаралташ ямдылалтше поэзий шулдыржым волтен колташ тыршеныт. Санденак тудо пытартыш жапыште нимом возен огыл.
Почешмутышто Валентина Изилянова теве кузе палемда:

Нимом шыч йод тый нигӧ дечын,
Кучем ыш жапле лӱмым, чонымат.
Лӱдде, саманым ойырыде, кечын
Тый ойлышыч эн сылнын чынымак.

Угыч савыктыме книгалан ончылмутым филологий науко кандидат Н.Федосеева возен. Тушко Светлана Эсаулован «Кинде-шинчал» тӱшка сборникыш (1982), шкенжын «Кидшер» (1991) сборникышкыже пурышо почеламут-влакым чумырымо. Тиде поэтессым шке жапыштыже ВЛКСМ ЦК-н «Молодая гвардия» журналыштыже (1990, №39) савыктыме улмаш. Почеламутшо-влакым Игорь Тюленев кусарен.
– Тиде ужаш поснак шерге,- палемден В.Изилянова. – Тудо йомын шуын ыле манаш лиеш.
А Герман Пирогов Светлана Эсауловам айдеме семын веле огыл пагала, тудын возымыжым рушлашке шуко кусарен. Чыла тидым у книгаште муаш лиеш. Тыгак «Шарнымаш сорта» рубрике йымалан посна еҥ-влакын шарнымашыштым савыктыме. Шарнен ойленыт нуно книга дене палдарыме годымат. Книгаште шуко фотоснимке уло.
Весымат палемден кодыман. С.Эсаулован творчествыжым йӧратыше да аклыше посна еҥ-влак «Светлана» фондым ыштеныт. Тудо самырык возышо-влак коклаште конкурсым увертарен (Положенийжым «Марий Элын» 23-24 майысе номерыштыже муаш лиеш). Тушко 30 ияш деч самырык поэт-влак ушнен кертыт. Икымше конкурсым тений шыжым поэтын шочмыжлан 60 ий теме кечын иктешлат.

Статьян авторжо Светлана Белкова,
“Марий Эл” газетыште печатлалтше статья

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.