1 июнь — Йочам аралыме тӱнямбал кече. Тудын вашеш республикыштына ятыр оҥай мероприятий эртаралте, кокымшо июньышто йоча-влаклан пӧлеклалтше пайрем Йошкар-Оласе Чарла Кремльыште эртыш.
Пайремым «Изи памаш», «Шокто, гармонь», «Росинка» ансамбль-влак да Советский районысо Ӱшнӱр кыдалаш школын тунемшыже-влак сӧрастареныт. Йоча-влакым саламлаш пайремышке тӱрлӧ виктышыште тыршыше пашаеҥ-влак толыныт: Марий Элысе тӱвыра, печать да калык паша шотышто министрын алмаштышыже Галина Ширяева, Республикысе марий тӱвыра рӱдерым вуйлатыше Валерий Григорьев да «Ямде лий» республикысе марий йоча газетын тӱҥ редакторжо Лидия Семёнова. Йоча-влаклан поро шомакым ойленыт. Каласен кодыман, пайремышке «Марий Юнкор — 2014» регион-влак кокласе слётын участникше-влакат ушненыт.
Пайремым «Ямде лий» республикысе марий йоча газет, «Саскавий» марий ӱдырамаш ушем да Республикысе марий тӱвыра рӱдер эртареныт.
