Марий йоча изинек шочмо йылмым йӧратыже, пагалыже да марий шӱлыш дене илаш тунемже манын, кеҥежым «Изи мӧр пеледыш» лӱман йоча-влаклан пӧлеклалтше Пеледыш пайрем эртаралтеш. Ты пайремым эртараш Ӱшнӱр школ вуйлатыше, Мер каҥашын еҥже, Галкин Валерий Федорович темлен. Икымше гана тыгай пайрем 2013 ийыште 7 июньышто Советский район Ӱшнӱр кыдалаш школышто эртаралтын. Тышке Марий Элысе 16 школ гыч 300 наре йоча погынен ыле. А тений тыгай пайрем нылымше июньышто Шернур посёлкышто Регион-влак кокласе йоча усталык фестиваль-конкурс семын эртаралте. Пайрем эркын-эркын вийым пога,ты гана республикысе 12 район гыч 500 утла йоча погынен. Пайремышке тӱрлӧ виктышыште тыршыше пашаеҥ-влак толыныт: Марий Эл Республикысе тӱвыра, печать да калык паша шотышто министрын алмаштышыже Галина Ширяева, Марий Оньыжа, «Мер каҥашын» председательже Анатолий Иванов, Туныктыш да шанче министерствын тӱҥ специалистше Галина Малинина, Советский район Ӱшнӱр школын вуйлатыше, «Мер Каҥашын» еҥже Валерий Галкин, Шернур районысо администраций вуйлатыше Николай Лебедев. Уна-влак йоча-влакым «Изи мӧр пеледыш» пайрем дене саламленыт, чыла сайым тыланеныт.
Йоча-влакын усталыкыштым ныл номинацийыште акленыт. Чылажге 110 мурымашым да куштымашым ончаш логалын. «Шкетын мурымаш» номинацийыште 8-10 ияш-влак коклаште 1-ше верым Шернурысо 2-шо №-ан школын тунемшыже Дарья Семёнова ден Полина Петухова суленыт, 10-14 ияш коклаште тиде школынак Дарья Лебедевам палемденыт, 14-18 ияш коклаште – ты школыштак тунемше Алла Лебедевам.
«Ансамбль дене мурымаш» номинацийыште 8-10 ияш коклаште 1-ше вер дене Шернурысо 2-шо №-ан школын «Радуга» ансамбльжым да Оршанке районысо Кугунур школын дуэтшым (Мария Акулова ден Кирилл Рябинин) палемденыт, 10-14 ияш коклаште – Шернур районысо Марисола школын «Ший оҥгыр» ансамбльжым, 14-18 ияш коклаште – Советский районысо Ӱшнӱр школын «Мурсем» ансамбльжым.
«Куштымаш» номинацийым ончалаш гын, 8-10 ияш коклаште Йошкар-Оласе» 7-ше №-ан школысо «Росинка» ансамбль икымше лийын, 10-14 ияш коклаште – Оршанке районысо Кугунур школысо «Шонанпыл» йоча образцовый фольклор ансамбль, 14-18 ияш коклаште – Параньга районысо Куракино школысо «Поро эр» ансамбль. «Йоча прикладной сымыктыш» номинацийыште икымше верыш Шернур районысо йоча усталык пӧрт лектын.
Пайремыште йоча усталык ярминга да тӱрлӧ конкурс-влак эртаралтыныт.
Тыгай сылне парйемым Марий Эл Республикын туныктыш да шанче, Тӱвыра, печать да калык паша шотышто министерстве-влак, «Мер каҥаш» марий ушем, Шернур районысо шинчымаш да самырык-влаклан паша шотышто отдел.
