«Тӱвыра» калыкле проект: Марий Элышке «Steinway» рояльым конденыт

Семӱзгарым налаш 9 миллионат 800 тӱжем теҥгем кучылтмо.

«Тӱвыра» калыкле проект кышкарыште республикысе тӱвыра тӧнеж ден музыкальный школ-влаклан семӱзгарым ситарыме паша умбакыже шуйна. Эртыше кечылаште Палантай лӱмеш тӱвыра да сымыктыш колледжыш кумдан палыме немыч компанийын ямдылыме «Steinway» рояльым кондымо.

Колледжым вуйлатыше Алексей Паскичевын мутшо почеш, семӱзгарым налаш 9 миллионат 800 тӱжем теҥгем кучылтмо. Сымыктышым умылышо-влак палат: тиде пеш кугу поянлык. Республикыштына тыгай рояль лач Эрик Сапаев лӱмеш театрыште гына уло.

Ушештарена, кодшо ийлаште «Николай Рубинштейн» да «Михаил Глинка» лӱман 18 у фортепианым налме ыле. Тений тиде пашалан 18 миллион теҥге ойыралтеш, палдара «Марий Эл» кугыжаныш теле да радио компаний.

Йолташ-влаклан палдараш
Кидшер
Шонымашым ешараш