«Марий книга издательстве» савыктыш пӧрт Марий Эл Республикын 100 ияш лӱмгечыжлан пӧлеклалтше мероприятий-влак кышкареш у антологий-влакым луктын. Нуно марий поэзий ден прозылан пӧлеклалтыныт, произведений-влак рушлаш кусаралтыныт. Кажне антологийже кок том дене савыкталтын. Лӱмгече серий дене лекше тыгай антологий икымше огыл – тылеч ончыч ош тӱням шочмо йылме дене Российыште илыше калык-влакын поэзийыштым марла палдарыше да марий драматург-влакын произведенийыштым рушлаш кусарыман сӧрал книга-влак лектыныт ыле.

У антологий-влак «Край соловьиный» (поэзий) да «Рассвет над Кокшагой» (прозо) маналтыт. Икымшышкыже тӱрлӧ пагытысе да тӱрлӧ тукым марий поэт-влакын посна почеламутышт пуреныт. Лудшо еҥ тиде антологийыште марий поэзийын тӱҥалтыш корнылаже («С.Г.Чавайнын «Ото» почеламутшо) гыч тачысе кече марте вияҥ толмо корныжым ужын кертеш. Чылаже 86 поэтын возымышт пурталтын. Икымше том тӱҥалтыште филологий науко кандидат Г.Н.Бояринован серыме «Марий поэзий: йӱкым илыш чын дене терген» статьяже уло. Шанчыеҥ тушто кӱчыкын да серыпын марий профессиональный поэзийын вияҥ корныж дене палдара, антологийлан ойырымо кажне поэтын тудлан гына келшыше усталык ойыртемжым почын пуа.

«Рассвет над Кокшагой» антологий тыгак кок том дене лектын, тушко 54 марий прозаикын возымышт, тӱҥ шотышто ойлымашышт, пурталтыныт. Книгам адакат Г.Н.Бояринован палдарымаш статьяже почеш, тудым автор «Марий прозо – калыкын кӧргӧ чонжын воштончышыжо» манын лӱмден. Книгам лудмек, тыгак марий прозо жанрынат С.Г.Чавайн гыч тӱҥалын тачысе писатель-влакын творчествышт гоч вияҥмыж нерген раш сӱретым ужаш лиеш.

Антологийысе произведений-влакым палыме руш писатель-влак кусареныт. Нуно тиде кӱлешан сомыллан тӱрлӧ жапыште шке усталык вийыштым чаманен огытыл, нунын тыршымышт дене марий литератур шке национальный кышкарже гыч лектын, моло калык-влакланат палыме лийын. Да, мутат уке, марий сылнымутын да марий автор-влакын кызытсе руш йолташышт тиде пашаш кумылын ушненыт да шочмо сылнымутнам кумдан шараш полшымаште тыршеныт.

Кажне антологийже 1500 экземпляр дене савыкталтын. Книгам комым сӱретче М.Ю.Клюкина мастарын сӧрастарен.

Г.Сабанцев, Ю.Соловьев

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.