Отымбал

0
61

Ший эҥер, ниялталын тӱретым,

Йогалеш, шелын тыйым покшеч.

Куэрла пойдара ю тӱсетым,

Вет уке мотор ял тыйын деч.

 

Отылаже ужар тӱсым налын –

Пеледалын уэш кундемем.

Ший ержат, чурийончышла койын,

Мыйымат моторракым ыштен.

 

Куэрет йырым-йыр шарлен кушкын,

Шӱшпык семже ял мучко шарла.

Колатат, шолт! тошкалын кеч-кушто:

Кӧргӧ чоным куан авалта.

 

Отымбал, таче угычын корныш

Ужаташ тыланет логалеш.

Чу, шорталме йӱкет мылам солныш…

Жап шуэш, пӧртылам мый мӧҥгеш.

 

Ала шып тымык кас шумо годым,

Мондалат мыйым тый йӧршынак.

Мый шонем эреак, кеч-кушечын

Пӧртылам тый декет шочшетла.

 

Шуэш мыйын йӱмем яндар вӱдым,

Памашет гыч кидем ден коштал,

Шуэш тыйым ужмем теле йӱдым

Тылзе волгыдо дене пырля.

 

Отымбал! Шӱмемлан моткоч шерге:

Тый гает уке шерге кундем.

Коремет гай кугу да чот келге

Тый декетше шӱм-чон шижмашем!

 

Отымбал, курымлан тыйын эргыч

Мый лиям, тый ӱшане мылам.

А каем гын тораш, мӱндыр вер гыч

Сай саламым колташ тӱҥалам.

Владимир Матвеев

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.