Гитар йолташем

98

Налам кидышкем мый гитарым,

Лыжган марий семым шоктем.

Кыллам тӱкалтен чаманалын:

Ты сем ден чонем луштарем.

 

Палем, тыланет тиде муро –

Шинчаш пеш тура ончалмаш…

Тыге ончалмет ден ит шуро

Шӱмемым кошар имыла.

 

Вараже, кидетым колталын,

Шеҥгек ончалде ошкылат…

А кызыт тунамсым шарнальым –

Шинча ончылнемак улат.

 

Омеш тый кончет кажне йӱдым,

Ушем гыч от лек нигунам.

Шарнем, аралем мый кум мутым,

Шыпрак мом ойлальыч мылам.

 

А уло мо кызыт, каласе,

Тунамсе гаяк келшымаш?

Тунамсе, мемнан чон кокласе

Пожар гай шӱмна йӱлымаш?

 

Молан тудо тул йӧрен кайыш?

Иктат огеш пале докан.

Шуына мо, каласе, ме сайыш?

Уке лач вашмутшо гына…

 

Кончет мыланем тые веле,

Эртен ошкылшат тый улат.

От пале, моткоч тыйым неле

Тӱжем еҥ коклаште муаш.

 

Налам кидышкем мый гитарым

Уэш сылне семым шокташ,

Тунамсе сай жапым шарналын,

У мурым тылат муралташ.

 

Владимир Матвеев

ОСТАВЬТЕ ОТВЕТ

Пожалуйста, введите ваш комментарий!
пожалуйста, введите ваше имя здесь

Лимит времени истёк. Пожалуйста, перезагрузите CAPTCHA.