Самырык пагыт –мотор рвезе пагыт,

Ӱмырын шийже, куанлан чевер –

Порсын ю  шулдыр ден порын ӧндалын,

Сылне ю чинчыжым мучко шавен.

 

Чон пеледеш латкандаш ияш годым,

Пуйто кӱзет кайыкла пыл лоҥгаш

Да чоҥештет, кечыйол дене модын,

Кечын ал тулжым тыршен руалташ.

 

Кажне шарна олык мучко куржталмым,

Поро йолташ дене кидым кучен,

Йӱксӧ гай шулдырым ваш шуялталын,

Шокшын ӧндалмым, ласкан ниялтен.

 

Йӱдым ший тылзе йымалне, шып годым,

Шӱшпык лач эркын кунам шӱшкалта,

Шӧртньо ер серыште коктын  вел кодын,

Ал тӱрвымат ушымаш ок мондалт.

 

Кӧн гын сита вийже, тидым мондалын,

Сылне, мотор илыш дене илаш?

Самырык пагыт кода юзо палым,

Тудым огеш лий йӧршеш кораҥдаш!

 

Кӧ гын монда тудым жап эртымеке?

Кӧ гын шона титаклен ӧпкелаш?

Шоҥгылык пагытыш трук тошкалмеке,

Кӧ Юмо деч огеш йод пӧртылташ?

 

Самырык пагыт –мотор рвезе пагыт…

Кажне, шонем, чаманен каласа.

Тудо шижде, но моторын эрта гын,

Рвезе лияш умыреш чон кӱшта

Владимир Матвеев

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.