Йомдарыме шӱлыш

Кунам уэш кастене тый лектат?

Йӱр шинчавӱд ден сусыртен чонем,

Толеш тек шӱлык шӱмышкем адак,

Но ӱшанен, лекметымак вучем.

 

Омеш кончет, улат тый Ош суксем,

Но шыргыжметлан весе куана.

Тек лийже мыйын шӱдӧ сулыкем,

Садак чонем кавашке чоҥешта.

 

Мый титаклаш ом тошт ош йӱдымат,

Кунам чоннам ушен ме шортынна.

Велале кочо чинчыжым тылзат –

Чылт кӧраненак шорто мыланна…

 

Но жап эртен… Тый ӧпкелен шортат…

Тӱрветын тамже кочо мыланем.

Молан тунам орадым ужынат,

Но ужын отыл кошкышо чонем…

Владимир Матвеев

Кидшер
Шонымашым ешараш