Пӱрӧ олаште марий йылме дене специалистым ямдылаш тӱҥалыт

У тунемме ий гыч Пошкырт кугыжаныш университетын Пӱрӧ филиалыштыже руш-марий йылме отделений почылтеш. Тидлан филиал 12 бюджет верым ойырен. Кыдалаш школым тунемше-влак коклаште ЕГЭ-м руш йылме ден обществоведенийым сдатлыше марий ӱдыр-рвезе-влак ты отделенийыш пурен кертыт.

Руш-марий полка «Эрвел марий» регион-влак кокласе калыкле-тӱвыра автономийын инициативыж почеш почылтеш.

Тидын нерген мыланна Пӱрӧ филиалын кугурак преподавательже, филологий шанче кандидат Алена Андреевна Илиева тыге увертарен:

«14 январьыште Мишкан селаште Пошкырт кундемын «Эрвел марий» ушемже черетан погынымашым эртарен. Тушто ик кӱлешан пунчалым луктыныт: «Пӱрӧ филиалыште марий пӧлкам угыч почаш кӱлмӧ нерген йодышым тарваташ». Тиде амал дене 15 январьыште Пошкырт кугыжаныш университетын Пӱрӧ филиалыштыже изирак погынымаш эртен. Филиал вуйлатышын сомылжым шуктен шогышо Ганеев Винер Валиахметович шкеж деке марий преподаватель-влакым (Илиева А.А., Апсатарова С.И), Мишкан район администрацийын председательжым (Сабиров В.А.), Мишкан ял озанлык да промышленность колледжын преподавательжым (Петров П.Т.) тиде йодыш нерген мутланаш ӱжын.

Ганеев В.В. раш каласен: марий пӧлкалан 12 бюджет верым ойырымо, тӱшкагудышто илаш вер сита, кӱкшӧ квалификациян туныктышо-влакат улыт. Но тунемаш пурышо-влак декат требований кугу: тунемаш пурашлан кӱкшӧ балл (70 деч шагал огыл) кӱлеш. Тыгай сай баллым колледжым тунем пытарыше-влаклан налаш куштылгырак. Молан манаш гын, нуным ЕГЭ результат дене огыл, а филиалыште эртарыме экзамен-влак почеш налыт. Экзамен-влак руш йылме, марий йылме да обществознаний дене эртаралтыт. А 11 класс деч вара нине предмет-влак денак ЕГЭ-н результатшым ончат.

Тиде погынымаштак эше тыгай иктешлымашым ыштеныт: марий пӧлкалан вияҥашыже Марий Элысе вуз да мер организаций-влак дене грантым налмаште пырля пашашке ушнаш, посна счетым почаш, туныктышо-влак дене пырля конференций-влакым эртараш, школ-влак дене кылым вияҥдаш, Мишкан ял озанлык да промышленный колледж дене ваш келшыме нерген договорым подписатлаш. Погынымашын лектышыже сай лиеш манын, ӱшанен кодына».

Ушештарен кодыман, Пошкырт университетын Пӱрӧ филиалже пелен тыгай полка 2018 ий марте пашам ыштен, вара чарнен, а 2021 ийыште угыч марий отделений шке пашажым тӱҥалеш.

Тыгак лудса

ОСТАВЬТЕ ОТВЕТ

Пожалуйста, введите ваш комментарий!
пожалуйста, введите ваше имя здесь

Лимит времени истёк. Пожалуйста, перезагрузите CAPTCHA.

spot_img

Увер йогын

Кызыт лудыт