Марий Элыште QR-код режимым пуртат

22 октябрь гыч республик ресторан, кафе, общественный питанийын моло предприятийже, кинотеатр, театр, филармоний, фитнес-рӱдер, бассейн гай общественный верлаште 18 ияш деч кугурак-влаклан вакцинаций але черым чытен лекме нерген QR-код, але сай ПЦР-тест нерген справке дене гына лийын кертме режимым пурта. Посна тӱшка граждан-влак у коронавирус инфекций деч прививкым ыштыктышаш улыт. А 65 ияш да тылеч кугурак ийготан пашам ыштыдыме, тыгак тӱрлӧ хронический черан вакцинироватлалтдыме але пытартыш куд тылзыште палемдыме черым чытен лекдыме граждан-шамыч посна улмо режимыш куснат, Республикыштына у коронавирус инфекцийым кондымым да шаркалымым шижтарыме шотышто оперативный штабын 12 октябрьыште эртыше заседанийыштыже увертарен Марий Элым вуйлатыше Александр Евстифеев.

Нине вашталтыш-влакым «У коронавирус инфекцийын (COVID-19) шарлымыжлан кӧра Марий Эл Республик кумдыкысо калыклан сай санитарно-эпидемиологический илышым ыштыме шотышто мере-влак нерген» указыш пуртымо.

«Республикыштына ситуаций моткоч начар, сандене указын у редакцийжым ямдыленна. Теҥгече Татарстан Республикын президентше Рустам Нургалиевич Минниханов деке кислородым ончычсо деч шукырак колтымо йодыш дене лектым. Элыштына утыждене шуко кислородым кучылтмылан кӧра космический сферыште эсогыл эн кӱлешан шымлыме пашам эртарымым чарненыт. Чыла кислород коронавирусым чактараш ойыралтеш. Ме кызыт медицине кислородым республикыштына ямдылаш тӱҥалме йодыш дене пашам кыртмен ыштена. Тидлан мыняр-гынат жап кӱлеш. А окса роскот нерген омат ойло. Ик мут дене каласаш гын, кызытсе ситуаций эн ончычак кажне еҥ деч шке тазалыклан мутым кучаш йодеш, вара веле – медик-шамыч деч», – палемден регионым вуйлатыше.

Указын у редакцийыштыже моло ешартыш мере-влакымат палемдыме. Тудын дене келшышын, торговльо, моторлык салон, фитнес-клуб, быт услуго, общественный питаний, шуко функциян рӱдер, тӱшка транспорт, образований, здравоохранений, социальный аралымаш, илыме да коммунал озанлык, тӱвыра да веселаҥдыме организаций, промышленный предприятий пашаеҥ-влак вакцинацийым эртышашак улыт.

22 октябрь гыч республикыштына сатулымо-веселаҥдыме рӱдерлаште верланыше общественный питанийын посна омсадыме предприятийже-влак сатум ужалыме да луктын обслуживатлыме деч моло услугым пуымым чарнат. Тыгак йоча модмо пӧлем ден веселаҥдыме рӱдер-влак петырналтыт. Тӱвыра да каныме парклаште, шке семын келыштарыме площадкылаште аттракцион-влак пашам ыштымым чарнат. Ийготыш шудымо йоча-шамычлан сатулымо рӱдерлаште ача-авашт але закон дене пеҥгыдемдыме еҥышт деч посна кошташ огеш лий. Физкультур ден спорт мероприятий-влак зритель-шамыч деч посна эртаралташ тӱҥалыт. Общественный питанийын организацийлаштыже яра пайдаланен кертме Wi-Fi-сетьым йӧртат.

А.Евстифеевын палемдымыж почеш, нине вашталтыш-влакым регионыштына эпидемиологический ситуацийын нелеммыжлан кӧра пуртымо.

Указын у редакцийже дене коронавируслан кӧра утларак ямде улмо режимым 1 декабрь марте шуйымо. Публичный, ончыктымо, кандарыме, веселаҥдыме, сотемдарыме, ончер, рекламе шотан да шуко еҥым иквереш чумырышо мероприятий-влакым ончычсо семынак эртараш чарыме. Калык шӱлымӧ органым аралыше средствыла дене пайдаланышаш, социальный дистанцийым эскерышаш. Тыгодымак общественный питанийын 23 гыч 6 шагат марте пашам ыштыше организацийже-влак почылтыт, но тушто веселаҥдыме мероприятий-шамычым ончычсо семынак эртараш огеш лий. Нине заведенийыш 18 ияш да тылеч кугурак граждан-влак вакцинаций (12 тылзе вийыште) але черым чытен лекме (6 тылзе вийыште) нерген QR-код, але сай ПЦР-тест (72 шагат вийыште) дене пурен кертыт, палдара “Марий Эл” газет.

Тыгак лудса

ОСТАВЬТЕ ОТВЕТ

Пожалуйста, введите ваш комментарий!
пожалуйста, введите ваше имя здесь

Лимит времени истёк. Пожалуйста, перезагрузите CAPTCHA.

spot_img

Увер йогын

Кызыт лудыт