Марий поэт-новатор Валентин Колумбын лӱмжӧ республикыште веле огыл, уло тӱняште палыме.
Валентин Христофорович Колумб — марий почеламутчо. Морко кундемысе Мызеҥер ялеш шочын. Вара нунын ешышт ты кундемысе Пумыр почиҥгаш илаш куснен.
Валентин Колумб тыгак тале шымлызе, шочмо йылмыжын тамжым да ямжым возышо мастар лийын. Тудо марий йылмын сылнылыкшым поснак умылен моштен. Колумб марий мутвундым пойдарымаш верч толкыным тарватен, поэзийже ден илышым вораҥдаш, тӱвырам нӧлташ лым лийде тыршен.
Тыршымыже арам лийын огыл. Поэзийым йӧратыше, тудым аклыше-влак шагал огыл улыт. Ынде 25-ше гана, 1989 ий годсек, поэтын шочмо верыштыже конкурс эртаралтеш. Тений чылаже тышке 70 наре лудшо погынен. Йоча-вакын усталыкыштым 7 номинацийыште акленыт: В. Колумбын, Морко районышто шочын-кушшо моло лӱмлӧ мутмастар-влакын, кызытсе самырык поэт-влакын почеламутыштым, шке шонымо почеламут-влакым эн сылнын лудмаште, мурым мурымаште эн сылнын йоҥгалтарыше-влак коклаште эн сайжым ойыреныт. Ойыртемалтше-влаклан дипломым да шарнымашан пӧлекым кучыктеныт.
Кажне ийын ты мероприятий мемнам у лӱм дене палдара. Ий гыч ийыш участник-влак шукемыт. Тидыже марий йылмын волгыдо ончыклыкшо нерген ойла.

Автор: Алеся Владимирова

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.