Марий самырыктукым черетан Россий кӱкшытыштӧ VI самырыктукым слётыш погынен. Слётыш Марий Эл Республик деч посна Российыште марий-влакын тӱшкан илыме эше тӱрлӧ регионжо гыч самырык-влак чумыргеныт. Одо, Пошкырт, Провой, Киров, Пермь, Татарстан, Ханты-Мансийск, Свердловск кундем гыч самырык-влак погыненыт. Каласен кодыман, слёт кажне ийын тӱрлӧ темылан пӧлеклалтеш. Ты гана слёт Параньга районысо Олор школ пелен эртаралтын. Тений слёт кузерак эртен тачысе уверыштына палдарена.
Россий кӱкшытысӧ марий самырыктукым слёт 2009 ий годсек кажне ийын эртаралтше мероприятий. Тылеч ончыч слёт-влак Морко, Советский, Курыкмарий, У Торъял, Волжск районлаште эртеныт, тӱрлӧ темылан пӧлеклалтыныт. Тений слёт 29 июнь гыч тӱҥалын 6 июль марте эртыш. А молан слёт кӱлеш? Тидын нерген организатор-влак теве мом ойлат: «Слёт ончыко ончышо шонымаш-влакым илышыш шыҥдара: самырык тукымын социал чолгалыкшым нӧлта, тудым марий калыкын тӱвыражым да йылмыжым аралымашке да вияҥдымашке шке надыржым пышташ кумылаҥда; калык ден тӱвыра-влак кокласе кылым вияҥдаш полша; пӱтынь Российысе икоян улмым, икте-весым пагалымаш кумыл-влакым вияҥда».
Кажне слёт шке ончылныжо посна задаче-влакым шында, ойлышна. Мутлан, V слёт граждан-влакын чолгалыкыштлан пӧлеклалтын гын, ты гана слётын программыже «Самырыктукым да верысе кучем» теме дене кылдалтын. Самырык-влак, слётын программыштыже участвоватлен, усталык мастарлыкым шуарыше пашашке ушненыт: лекций да семинар занятий-влак, шымлызе, мер пашаеҥ, депутат, кидмастар, яра жапым да тазалыкым пеҥгыдемдыше мероприятий-влакым организоватлыше-шамыч дене вашлиймаш, тыгак тӱвыра-историй верлашке экскурсий-влак лийыныт. Слётыш толшо-влак сайлымаш кампаний, депутат паша нерген шуко пален налыныт да шкештат тиде паша гоч эртеныт.
Мемнан сайтыштына слёт гыч тӱрлӧ сынан материал-влакым тыланда лудаш, ончаш темлен улына. Нине материал-влакым те кылвер (ссылке) почеш ончалын кертыда.

«Кидшер» этнокультур сайтын редакцийже

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.