Тыге маналтеш «Марий журнал» кугыжаныш унитар казна предприятийын лукмо у книга. Авторжо — Удмурт Республикын калык писательже, Антон Дельвиг лÿмеш Россий кумдыкан премийын лауреатше Вячеслав Ар-Серги. Тудын марла ойпогышкыжо повесть ден икмыняр ойлымашым да почеламут-влакым пуртымо. Повестьым писатель Юрий Соловьёв, почеламут-влакым Марий Элын калык поэтше Анатолий Тимиркаев ден поэт Геннадий Сабанцев-Ояр кусареныт.
Палемдаш кÿлеш, одо серызе Вячеслав Сергеев («Ар-Серги» — тудын псевдонимже) Марий Эл дене, марий сылнымут дене эше 1980-шо ийла тӱҥалтыш гычак пеҥгыде кылым куча. Тунам тудо икымше гана Йошкар-Олашке толын, ик ий Марий кугыжаныш университетыште марий йылмым тунемын. Тудым кызытат монден огыл. Тунамак самырык марий автор-влак, кызыт палыме писатель-поэт, усталык пашаеҥ-влак дене пеҥгыде йолташле кылым кучен. Чыла тидын нерген В.Ар-Серги «Муралте, куку, муралте…» книгажын презентацийже годым чон почын каласкалыш. Презентацийжым С.Г.Чавайн лӱмеш национальный библиотекысе краеведений да национальный литератур пӧлка эртарыш. Тышке сылнымутым йӧратыше, аклыше ятыр еҥ, мер организаций да кугыжаныш учрежденийла гыч пашаеҥ-влак погыненыт ыле. Одо да марий литератур кокласе ожнысекак пеҥгыдемше кыл нерген, Вячеслав Ар-Сергин творчествыж нерген тудын марий йолташыже-влак да тыгак туддене пырля толшо еҥ-влак каласкаленыт. Погынышо-влак Ар-Сергилан ятыр йодышым пуэныт. Нунылан одо йолташна лачак тудын койышыжлан келышышнын — келгын да мыскара шÿлыш дене вашештен.
Презентацийым Ю.Соловьёв вÿден.
«Муралте, куку, муралте…» книгам Марий Элысе Тÿвыра, печать да калык-влакын пашашт шотышто министерствын социально кӱлешан литературым лукташ окса дене полшышо программыже почеш савыктыме.
«Марий журнал» кугыжаныш унитар казна предприятий