Интернет айдемын илышышкыже шыҥенак пура. Тӱрлӧ предприятий-влак, марий газет ден журнал, мер организаций-влак шке сайтыштем тӱрыснек марла вӱдат але марий вариантым темлат. Икмыняр тылзе ончыч интернетыште марий сайт-влак нерген возенна ыле. Кызытат марий сайт ден блог-влакым шергал лекна. Палемдыме шуэш, тачысе кечылан интернетыште нылле кандаш марий шӱлышан сайт уло. Кок тӱжем латнылымше ий пытен огыл гынат, изирак иктешлымашымат ыштен кертына. Шорыкйол тылзын шке пашажым «Кидшер» этнокультур сайтна тӱҥалын. Тидын годымак «Кугарня» да «Марий Эл» газет лудшыштлан у тӱжвал тӱсан сайтым темлат. Икмыняр арня ончыч оҥай MariBlog.ru у сайт шочын. Тудын авторжо самырык да чолга марий рвезе Евгений Декин тиде сайтым лудаш да ончаш темла.
Марий йылме интернетыште вияҥеш манына гынат, но интернетыште марла мутланыше шагалак вашлиялтеш. Чолга марий еҥ-влак, марий мурызо, актёр, журналист ятыр гана серышым рушла возат, но вет нунак мемнам марий мероприятийышке кошташ кумылаҥден шогат. Тыгай сӱретым ужмек марий калык, марий интеллигенций верч намыс чучеш.
Возымо шотыштат каласен кодыман. Сайт-влак тӱрлӧ улыт, нуно тӱрлӧ стиль дене возкален шогат, но возымо годым йоҥылышым шукынжо ыштат. Предложенийым йоҥылыш чоҥат, пунктуаций да орфографий йоҥылышат вашлиялтеш. Тидыже лудшылан ӧпкелалташ амалым луктеш.
Туге гынат, ме марий калыкым йӧратен, пагален илышаш улына. Марий калыкын йылмыжым, тӱвыражым, йӱлажым, тудын эртыме корныжым шарнаш кӱлеш. Ме марий калык вожылшаш огына ул. Марла мутланаш, йочанам марий йылмылан туныкташ, марий блогым, сайтым вӱдаш, марий йылме нерген вес калыклан каласкалаш, вожылде мый марий улам маншаш улына.
